РД-дин Кьилин везифаяр вахтуналди тамамарзавай Фёдор Щукина 9-июндиз Россиядин Игит Залибег Умаевахъ галаз гуьруьш кьиле тухвана. Идакай «Лезги газетдиз» РД-дин Кьилин пресс-къуллугъди хабар гана.
Гуьруьшдал абуру акьалтзавай несилдиз ватанпересвилин тербия гунин, уьлкведин регьберди вилик эцигнавай тапшуугъар кьилиз акъудунин ва республика вилик тухунин месэлаяр веревирдна.
Фёдор Щукина хайи Ватандин къуллугъда акъвазнавай гьар са кьегьал акьалтзавай несилдиз чешне тирди къейдна: «Са шакни алачиз, куьн халис дагъустанвидин, гужлу руьгь авай къагьримандин жегьилар патал дуьз рехъ къалурзавай чешне я. Чна квел дамахзава», — лагьана ада, Игитдихъ элкъвена.
Вичин нубатда Залибег Умаева вич хушдиз кьабулунай республикадин регьбердиз сагърай лагьана ва гьам фронтда, гьамни далу пата къуватар сад авунин игьтияж авайди къейдна. Игитдин фикирдалди, идалай РФ-дин Президентди тайинарнавай тапшуругъар кьилиз акъудун аслу я.
Алава хъийин, полковник Залибег Умаев «Время героев» программа акьалтIарнавайбурукай сад я. Гьукумдин органра кIвалахдай тежрибадихъ галаз таниш хьайидалай кьулухъ ам эцигунрал гуьзчивалдай Федеральный центрадин гендиректордин заместителвиле тайинарнава.
Чи мухбир
