РД-дин образованидинни илимдин министерстводин къаюмвилик кваз 30-майдиз «Ахцагь» спорткомплексда спортшколайрин (ДЮСШ) жегьил пагьливанрин арада азаддиз кьуршахар кьунай Дагъустанда СССР-дин спортдин 1-мастер тIвар къазанмишай Абдулали Гъаниеван экуь къамат эбеди яз рикIел хуьнин лишандик кваз республикадин дережадин кIвенкIвечивилин турнир кьиле тухвана.
Вичин кьилин макьсад жегьилар куьчедин чIуру таъсирдикай хкудун, абур спортдал, сагълам уьмуьр тухунал желб авун, Дагъустандин халкьарин дуствилин алакъаяр мягькемарун тир акъажунар тамамвилелди мурад-метлебдив агакьна.
РикIел хкин, тIебии бажарагъ-къуват авай А. Гъаниев пешекар спортдал Советрин Армиядин жергейра къуллугъзавай 1951-1953-йисара машгъул хьана, Туьркестандин военный округдин чемпионвилин дережа къачуна. 1955-йисуз СССР-дин спортдин мастервилин тIвар къачуналди, ам азаддиз кьуршахар кьунай Дагъустандин тарихда сифте пагьливан яз гьатна. Пагьливанвилин кIвалах бегьемарна, гзаф йисара Ахцегь райондин спортдин ДСО «Урожай» тешкилатдин председателвиле ва тренервиле кIвалахиз, Абдулалиди Къурбан Агъаев, Султан ва Сулейман Эфендиевар, Къадир Пирсаидов, Абумуслим Вагьабов, Эсед Шагьмарданов, Мегьамедвели Гъаниев хьтин машгьур са жерге пагьливанар тербияламишна.
Акъажунра иштиракун патал Ахцегьиз Дагъустандин саки вири шегьерринни районрин командайрик кваз 140 жегьил (2011-2012-йисара дидейриз хьайи), гьакI абурун диде-бубаярни тренерар, чкадин гьевескарар кIватI хьанвай. Девирдин истемишунрив кьурвал тадаракламишнавай чIехи залда кьве гьасирдал пакамалай няналди давам хьайи итижлу бягьсер спортдин халис сувариз элкъвена.
Мугьманар райондин кьиле авайбурун патай рикIин сидкьидай тебрикуналди ва Абдулали Гъаниеван экуь къамат рикIел хкуналди, акъажунар депутатрин Ахцегь райсобранидин председатель Гьажимурад Парпачева ачухна. Спортдин суварин тешкилатчийрин, иштиракчийрин ва тамашачийрин тIварарихъ хуш келимаяр Ахцегьрин ДЮСШ-дин тренер, азаддиз кьуршахар кьунай 1-категориядин судья, Абдулали Гъаниеван хтул Мугьаммад Гъаниева, акъажунрин кьилин судья, халкьарин арадин дережадин судья, РД-дин физкультурадинни спортдин лайихлу къуллугъчи Мегьамедрасул Гьадисова ва масабуру лагьана.
Турнирдин нетижайрикай рахайтIа, заланвилин 10 категориядай акъажунрин чемпионарни призёрар тайин хьана. Абурун жергедик чкадин командадикай анжах кьуд кас акатна: Гьасанбегов Ибрагьим (75 кг.) – 1-чка, Мисиев Имам (38 кг.) – 2-чка, Абдулгьалимов Азиз (48 кг.) – 2-чка, Ильясов Абдурагьман (38 кг.) – 3-чка. Гъалибвилин чкаяр къазанмишай вири пагьливанар РД-дин образованидинни илимдин министерстводин патай талукь дережайрин медалризни дипломриз ва кубокриз лайихлу хьана.
Дашдемир Шерифалиев
