Мегьарамдхуьруьн райондин Советский хуьре волейболдай Къурбанд сувариз талукьарнавай районрин уртах турнир кьиле фена. Ана Кьурагь, Хив, СтIал Сулейманан ва Мегьарамдхуьруьн районрин командайри иштиракна.
Акъажунар хуьруьн мискӀиндин тешкиллувилин комитетди ва Советский хуьруьн администрацияди тешкилнавай.
Гьуьрметлу мугьманрин арада Дербентдин Абдулла эфендидин тӀварунихъ галай Исламдин университетдин ректор Ариф гьажи Сеидов, Мегьарамдхуьруьн мискIиндин имам Мумин гьажи Бедерханов, Туьркиядай хтанвай ватанэгьлияр, Советский хуьруьн агъсакъалрин советдин векилар, патарив гвай хуьрерай атанвайбур авай.
Лагьана кIанда, акъажунар хъсан дережада аваз кьиле фена, иштиракчийри абур неинки са спортдин, гьакIни вири садзавай дуствилин сувар хьиз кьабулна.
Турнирдин нетижада сад лагьай чка Кьурагь райондин командади кьуна. Гъалибчидиз кубок ва 25 агъзур манат пулдин пишкеш гана. Кьвед лагьай чкадиз СтIал Сулейманан райондин команда лайихлу хьана. Савкьат яз, и командадиз кубокни 20 агъзур манат пулдин пишкеш гана. Пуд лагьай чкадин ва кубокдинни 15 агъзур манат пулдин пишкешдин сагьиб Хив райондин командадикай хьана.
Идалай гъейри, акъажунра тафаватлу хьайи са шумуд волейболистдиз пулдин пишкешарни грамотаяр гана. Виридалайни хъсан тренер ва къугъвазвайбурук руьгь кутурди яз гьисабай Советский хуьруьн тренер Ремзи Къарибов грамотадиз лайихлу хьана.
Чи мухбир
