Россиядин халкьарин садвилин йис
И йикъара Россиядин халкьарин садвилин йисан сергьятра аваз Эминхуьруьн ктабханада шад мярекат кьиле фена. Ам инин заведующий Алла Буржалиевади ачухна ва кьилени тухвана.
Мярекатдал яргъал йисара Россиядин МВД-дин къурулушда, гьа жергедай яз РД-дин къенепатан крарин министрдин заместителвиле кIвалахай, алай вахтунда запасда авай полициядин полковник Тагьир Рамазанова уьлкведа, чи республикада жуьреба-жуьре миллетрин векилар санал дуствилелди яшамиш жезвайдакай, вичи кIвалах авур чкайрикай метлеблу рахунар авуна.
Чи республикадин халкьарин векилри садвал зурба къуват тирди Афгъанистанда кьиле фейи женгинин гьерекатрани къалурна. Идакай «афгъанви» Мегьамедзагьир Абдукеримова рахунар авуна.
Мярекатдал Эминхуьруькай чпиз хайи кIвал хьанвай татарви дишегьли, яшар 85 йисалай алатнавай Саният Рамазановади, рутулви Оксана Абдулаевади ва агъулви Фая Абдулаевади халкьарин садвиликай, лезгийрин хуш рафтарвиликай, гьуьрметлувиликай авур ихтилатар мярекатдин иштиракчийриз гзаф бегенмиш хьана.
Рахунрин арайра гьевескарар тир Раижат Жигеровади, Гуьлхалум Наврузовади, Жейран Мирзоевади халкьарин дуствиликай манияр лагьана, библиотекадин кIелзавайбур тир Адиля Батмановади, Юсуф Кьасумова, Керим Абдулгьалимова, Мадина Азиметовади шиирар кIелна, музыкант Шакир Магьарамова милли авазар тамамарна, школьникри кьуьлер авуна.
Хазран Кьасумов
