Махачкъаладин «Динамо» команда Россиядин премьер-лигада амукьда. 2025/2026 лагьай сезондин нетижада «Динамо» акъажунрин таблицада 14-чкадал хьана. Дагъустандин команда уьлкведин виридалайни машгьур лигадай акъатиз са кIам-шам амай.

Къейд ийин, эхиримжи турда чибур 17-майдиз «Анжи Аренадал» Москвадин «Спартакдихъ» галаз къугъвана, матч 0:0 гьисабдалди акьалтIна. Сезондин муддатда анжах 26 хал къазанмишиз алакьай «Динамо» РПЛ-да амукьун патал Екатеринбургдин «Урал» командадихъ галаз акъажунар кьиле тухуниз мажбур хьана. 20-майдиз Екатеринбургда кьиле фейи къугъун 0:1 гьисабдалди чибурун хийирдиз акьалтIна. Кьвед лагьай (жавабдин) къугъун 23-майдиз «Анжи Аренадал» кьиле фена ва и сефердани чибуру уралвийрилай чеб викIегь тирди успатна – къугъун 2:0 гьисабдалди акьалтIна.

Сезондин эхиримжи къугъуниз килигиз РД-дин Кьилин везифаяр вахтуналди тамамарзавай Ф. Щукин, РД-дин премьер-министр М. Рамазанов, РД-дин виликан Кьил С. Меликов атанвай. Гуьгъуьнлай абуру футболистриз, тренеррин дестедиз ва вири дагъустанвийриз Махачкъаладин «Динамо» РПЛ-да амукьун патал кьиле фейи важиблу къугъуна къазанмишай гъалибвал вирибуруз мубаракна.

Къейд ийин, РПЛ-дин 2026/2027-сезон алай йисан 26-июлдиз башламиш жеда.

Чи мухбир