ДаркIушрин хуьр «Кьасумхуьр – Кьурагь» шегьре рекьин мукьув, КIахцугърин хуьруьн къаншарда, рагъакIидай пата экIя хьанва. Хуьруьн тIварцIикай ва ам арадал атай вахтуникай тамам малуматар чав агакьнавач.

ДаркIушрин хуьруьн рагъэкъечIдай пата архитектурадин памятник яз гьисабзавай мискIин ава. Хуьруьн кефердинни рагъэкъечIдай патан къерехда сурар, хуьруьн юкьва тухумдин сурар ава. Хуьруьн кефердинни рагъакIидай патан къерехдихъ фейила, пIир ва куьгьне сурар аквада.

ДаркIушвияр малдарвилел, хуьруьн майишатдал, багъманчивилел машгъул жезвай. Хуьруьн лежберар кеспидал машгъул хьун патал вахт-вахтунда шегьерризни физвай.

1886-йисан переписдин делилралди, куьгьне ДаркIушрин хуьре 85 майишат ва 418 агьали авай. Абурукай 204 итимар тир, 214 – дишегьлияр.

1966-йисуз, Кьиблепатан Дагъустанда залзала хьайидалай кьулухъ, даркIушвияр арандиз куьч хьана ва ана арадал атай цIийи хуьруьз ДаркIуш-Къазмаяр лагьана.

Мурад Мегьамедкеримован

«СтIал Сулейманан район: ­тарихдин гелерай» ктабдай.