«Лезги газетдин» алай йисан 18-нумрада Абдулафис Исмаилован «Пул вири я, анжах хайи Ватан туш» макъала кIелайла, заз гзаф хвеши хьана. Ана зи куьгьне дуст, машгьур шаир, таржумачи, литературовед ва театровед Азиз Мирзебегован яратмишунрин четин, вакъиайралдини агалкьунралди девлетлу рекьикай вичин фикирар лагьанва, литератордин эсерриз чIехи къимет ганва, Азиз вичин вири алахъунралди ва алакьунралди хайи халкьдин рикIяй рахазвай шаир тирди субутнава ва эхирдайни чи рикIел адаз «Дагъустандин халкьдин шаир» тIвар гун икьван чIавалди татунал мягьтелвални наразивал къалурнава.
Республикадин газетрин арада виридалайни чIехи тираж авай чи газетда Дагъустандин журналистикадин агъсакъалди-устадди ихьтин месэла винел акъудуни и кар рикIивайни фадлай авайди ва гьялна кIанзавайди къалурзава.
Азиз Мирзебегов чи эдебиятда 1980- йисарилай, галатун тийижиз, вичин чан эцигна, ягь-намусдивди, инсанвилин дережаяр хвена, кIвалахзавай кас тирди тек са чи лезгийриз ваъ, Дагъустандин амай халкьарин интеллигенциядин векилризни фадлай чизва, вирида адан кхьинрин кьетIенвал рейсадвилелди къейдни ийизва.
Зани адан яратмишунрикай макъалаяр, адан бязи ктабриз сифте гафар кхьейди я, адан кхьинрин кьилдин хилерикай жуван веревирдер авурди я. Са шакни алачиз, Азиз Мирзебегова кIвалахзавай вири хилера вичин бажарагъ лап вини дережадиз акъуднава, вирина вичин рикIин сидкьидинни илгьамдин, шаирвилинни инсанвилин чIехи дережайриз къелемдин вафалувал хвенва.
Шаирвилин рекье адан шиират чи эдебиятдинни РагъэкъечIдай патан эдебиятдин арада авай муьгъ хьиз кьабулиз жеда. Шаирди а патан шииррин къадим гзаф кIалубриз лезги чIалан майданра кутугай чкани къенин аямдив кьур цIийи уьмуьр гана. Таржумачи яз, ада дуьньядин гзаф халкьарин шаирар Етим Эминанни Сулейманан чIалалди рахурна.
Эдебият чирунин илимда гзаф авторрикай дерин ва маналу макъалаяр, монографияр кхьена, алатай ва алай аямдин чи сейли шаирринни гьикаятчийрин яратмишунар тупIалай авуна, абурукай кьилдин ктабар акъудна.
Лезги театрдин тарихдикай кхьенвай макъалаярни ктабар лагьайтIа, чи милли медениятдин тарихда генани кьетIенбур, авайни-авачирбур хьанва. Хайи театр патал лезги чIалаз ада таржума авунвай кьван пьесаярни кьилдин са хазина я.
Санлай къачурла, чи медениятдик Азиз Мирзебегова зурба пай кутунва. Икьван зегьметриз, агалкьунриз къимет тагана тун мягьтел жедай, наразивал арадал гъидай кар я. ГьакI хьайила, гьуьрметлу Абдулафис Исмаилова къарагъарнавай, Азиз Мирзебеговаз «Дагъустандин халкьдин шаир» лагьай тIвар гунин гьакъиндай месэла вири халкьди къуьн кутуна гьялна кIанзавайди я. И кардиз гьукуматдин идарайра авай лезги гьакимрини, чи меденият, эдебият вини кIарцIе хьунихъ рикI кузвай вирида рум ганайтIа кIандай. Къуй гьакI хьунни авурай.
Арбен Къардаш,
Дагъустандин халкьдин шаир
