Дагъустандин МФЦ-дин идарайри СВО-дин иштиракчияр патал пулунин цIийиз тайинарнавай такьатар къачунин патахъай арзаяр кьабулзава. Ихтилат 300 агъзур манатдикай физва, ам женгинин тапшуругъар кьилиз акъуддайла бедендиз хасаратвилер хьайи, нетижада I группадин инвалидвал къачуниз мажбур хьайи иштиракчийриз гузва. Залан хирер хьайибурувай гила, куьмек яз, республикадин бюджетдай са сеферда гузвай и пулунин такьатар къачуз жеда.
Дагъустандин гьукуматдин къарардал асаслу яз, ихьтин такьатар къачудай ихтияр 2022-йисан 24-февралдилай инихъ тир муддатда дяведин махсус серенжемда женгерин гьерекатра иштиракдайла бедендиз еке хасаратвилер (хирер, тIарвилер, контузия) хьайибуруз талукь я.
Къейд авун важиблу я хьи, ихтилат физвай 300 агъзур манат анжах са сеферда къачуз жезва. Арза ва документар МФЦ-дин вири идарайри кьабулзава. Пешекарри арзачийриз арзаяр ацIуриз куьмекда ва документар гъиле-гъилди ахтармишда. Алава малуматарни меслятар МФЦ-дин идарайрай къачуз жеда.
«Лезги газет»
