Серенжемрикай

РД-дин зегьметдин ва яшайишдин рекьяй вилик финин министрдин везифаяр вахтуналди тамамарзавайди тир М. Кихасурован гафаралди, ЧС-дин зонадик акатай муниципалитетрин УСЗН-ри алай вахтуналди (материал 14-майдиз чапнава) зиянар хьанвай 20 816 касдиз куьмекдин пулар ганва. Идакай РД-дин кабминдин телеграм-каналди раижзава.

Къейдзавайвал, гьа гьисабдай яз 14 928-даз — са сеферда гузвай материальный куьмек яз, 5 878-дазни сифтегьан игьтияж авай эменни терг хьунай гузвай пулдин такьатар яз ганва. Санлай къачурла, и серенжемриз 820 миллион манат акъатнава.

Селлер атуникди зиян хьанвай 20 муниципалитетдикай 5-да – Гуьмбет, Тлярата, Хунзах, Чарода ва Лак районра – пулар гунин кIвалах гьеле кьиле тухванвач. Къули районда лагьайтIа, чпикай ихтилат физвай пулдин такьатар гунин серенжем уьмуьрдиз кечирмишунин кIвалах явашдиз кьиле физва. Ада раижзавай къейдерин гъавурда акьазвайвал, и кардин кьилин месэлайрикай сад кIвалерихъ… махсус документар тахьун я. РикIел хкин, виликдай хабар гайивал, гьар са касдиз са сеферда гудай куьмек 15 675 манат я. Сифтени-сифте эменнидикай магьрум хьунай гуда (арза ЧС кардик кутурдалай кьулухъ са вацран вахтунда агакьарун лазим я):

– эгер эменни тамамдаказ терг хьан­вачтIа, – 78 735 манат гьар са касдиз;

– эменни тамамдаказ терг хьан­ва­тIа, – 156 750 манат гьар са касдиз (арза – ЧС-дилай кьулухъ 6 вацран вахтунда).

Сагъламвилиз зарар хьайила (арза са йисан вахтунда агакьариз жеда): юкьван дережадин ва я лап еке хасаратвилер хьанватIа, – 627 000 манат гуда. Кьезил зарар ганвайла, – 313 500 манат.

Инсан телеф хьайила, кьейи касдин хизандиз 1 567 500 манат гузва. И пул хизандин сагьибрин арада сад хьтин кьадарда пайзава. Арзаяр МФЦ-дин ва я яша­йиш­дин рекьяй хуьдай министерст­водин управленидиз ва «Госкъуллугърин»­ сайтдиз рекье тваз жеда.

Зирзибил вегьедай чкаяр

Махачкъалада хъсандиз дуьзмишунин ва зирзибил вегьедай махсус къапар эцигдай майданар туькIуьрунин кIвалахар давам жезва. Идакай шегьердин администрациядин сайтда раижзава. ЖКХ-дин управлениди гьакIни кардик квай зирзибил вегьедай къапар цIийи хъувунин серенжемарни кьилиз акъудзава.

Кьилди къачуртIа, алай вацра ихьтин 40 майдан туькIуьрун пландик кутунва. Гьар са чкадани, мулкунал ацалтзавай парцелай аслу яз, зирзибил вегьедай 4-далай 8-дал кьван махсус къапар ава.

Санлай къачурла, алай йисан январдилай инихъ къапар эцигдай 100-далай гзаф ихьтин майданар туькIуьрнава ва 1 700-далай артух къапар чпин чкайрал ала.

Къейдзавайвал, а пакетар куьчейра­ гьатнавай кицIери пад-падзава, къене авай зирзибил кьуд патахъ чкIизва. Не­тижада, ЖХК-дин къуллугъчийри гьар юкъуз михьивилерин серенжемар кьиле­ тухузватIани, кIвалахзавай фялейрин зегь­мет бадгьаваянди жезва.

«Тавакъу ийизва, зирзибил анжах кон­тейнерриз гадара, ТКО авай пакетар гьар гьинал хьайитIани тамир!», — эвер гузва сайтда.

Къиметрин гьакъиндай

Дагестанстатди агьалийриз метягьар маса гунин (потребительский) къиметрин гьар гьафтедин ахтармишунин нетижаяр чапнава. Ведомстводин делилри шагьидвалзавайвал, салан са жерге майвайрин къиметар, сезондихъ галаз алакъалу яз, агъуз аватнава, гьа са вахтунда якIун суьрсетдин къиметри виниз акъатун къалурзава. Идакай «Дагъустандин экономика» телеграм-каналди раижзава.

Хъсан патахъ дегиш хьунин ериш салан майвайрин къиметри къейднава. Раижзавайвал, афнияр 11 процентдин ужуз хьанва, юкьван гьисабдалди абурун 1 килограмм 101,43 манатдай хьанва. Помидорар лагьайтIа, 10,5 процентдин ужуз хьанва – 1 килограмм 183,56 манатдай. Картуфрин къимет 3 процентдин агъуз аватнава, килограмм — 52,76 манатдай.

ГьакI республикада вечрен какаяр ужуз хьунни давам жезва. Гьисаб тухунин гьафтеда абурун къимет 5,5 процентдин агъуз аватнава. ИкI, 10 кака гила 111,72 манатдай я.

Гзаф затIарин къиметар умумидаказ агъуз аватунизни килиг тавуна, яшайишдин кар алай метягьар багьа хьанвайдини къейднава. ИкI, лацу келемдин къимет гьафтедин къене садлагьана виниз акъатнава – 17,5 процентдин. Са килограммдин къимет 51,19 манатдал кьван хкаж хьанва. Хипен як лагьайтIа, 4,4 процентдин багьа хьанва, гила регионда юкьван гьисабдалди­ 1 килограммдин къимет 750,02 манатдай я.

Гьазурайди – М. Агьмедов