Дагъларин уьлкведа ва Россияда хьиз, къецени машгьур спортсменрикай сад, тайский боксдай дуьньядин чемпион Жабар Аскеров и мукьвара Мегьарамдхуьруьн спортдин 2-нумрадин школада устадвал хкажзавай ва вердишвилер къачузвай жаванрихъ галаз гуьруьшмиш хьана. Машгьур тренер, спортдин мастер Садир Айвазова хабар гузвайвал, жаванар патал и югъ халис сувариз, мярекатни яргъалди рикIел аламукьдайдаз элкъвена.
Хайи макандиз хтай чIавуз машгьур ватанэгьли райондин кьил Нариман Эфендиевахъ галазни гуьруьшмиш хьана.
Къейд авун лазим я хьи, жаван чIавуз ада спортдин рекье вичин сифтегьан камар и спортзалда къачуна, сифтегьан агалкьунарни и макандихъ галаз алакъалу я. РикIел хкин, Ж. Аскерова вири 121 бягьс кьиле тухвана, абурукай 92 (42 нокаутдалди) гъалибвал къазанмишуналди акьалтIарна.
Яргъалди давам хьайи мярекатдал бажарагълу спортсменди вичин уьмуьрдикай, спортдин рекьикай, тежрибадикай суьгьбетарна, жаванриз насигьатар гана. Хъсан тешкиллувал аваз кьиле фейи мярекатдал кIватI хьанвайбуру Жабаравай, спортдинни уьмуьрдин рекьикай хьиз, адан аял вахтарикай, сиясатдикай, культурадикай, диндикай (ва икI мад) хабарар кьуна.
Дугъриданни, машгьур спортсменрихъ галаз гуьруьшар тешкилун эхиримжи вахтара хъсан адетдиз элкъвенва. Абуру неинки жаванрин руьгь хкажзава, спорт кIанарзава, ихьтин серенжемрихъ гьакIни сагълам уьмуьр раиж авунин, руьгьдиз мягькем ва сагълам инсанрин несил тербияламишунин, ватанпересвилин тербия гунин рекьерайни, шаксуз, еке менфятлувал ва къиметлувал ава.
Рагнеда Рамалданова
