Садазни сир туш хьи, къенин аямда хайи чIаларин месэладиз йисалай-суз артух фикир гунин чарасузвал арадал къвезва. Хцидаз элкъвенвай и месэладивай, шад жедай кар я, мергьяматлувилин фондар, жумарт ватанэгьлияр, меценатар къерех жезвач. Ихьтин мисалрикай сад Дербентда лезги чIал чирзавай ученикрикни абурун муаллимрик гьар йисуз гьевес кутазвай РД-дин Халкьдин Собранидин депутат, машгьур меценат Имам Музамудинович Яралиева арадал гъанвай мергьяматлувилин «Возрождение Дербента» фонд я.
ЦIи И.Яралиева и фондунин патай кIелунин 2026/2027-йисуз гьар вацра лезги чIалан 6 муаллимдиз стипендия гунин къарар кьабулнава. Стипендиядиз лайихлу муаллимар хкягъун патал 16-майдиз фондуни СтIал Сулейманан тIварцIихъ галай лезги госмуздрамтеатрдин дараматда тешкилай конкурсда шегьердин жуьреба-жуьре мектебра лезги чIаланни эдебиятдин тарсар гузвай 9 муаллимди иштиракна. Санлай къачурла, иштиракай вирибуру чеб лезги чIалан хъсан пешекарар тирди успатна.
Муаллимри лезги чIалазни эдебиятдиз талукь жуьреба-жуьре тапшуругъар, тестер тамамарна. Конкурс, тайинарнавай къайдада баллрин куьмекдалди къимет гуналди, гьахълудаказ кьиле фена.
Хайи чIалан муаллимрин машгьурвал хкажунин, абурук гьевес кутунин макьсаддалди цIи сифте яз тешкилай конкурсдин нетижаяр ихьтинбур хьана: 1-чка Гуьлназ Адаевади кьуна (18-нумрадин гимназия); 2-чка – Назиля Агъабалаевади (21-нумрадин мектеб) ва Наида Хановади (21-нумрадин мектеб); 3-чка – Таиса Магьмудовади (18-нумрадин гимназия), Альбина Магьмудовади (2-нумрадин гимназия) ва Эльвира Керимхановади (14-нумрадин мектеб).
1-чка кьур муаллимдиз 20 агъзур манатдин кьадарда аваз пулунин пишкеш гана, 2-чка кьурбуруз – гьардаз 15 агъзур манат, 3-чка кьурбуруз – гьардаз 10 агъзур манат. Идалайни гъейри, винидихъ къейд авурвал, кIелунин 2026/2027-йисуз тIварар кьунвай ругуд муаллимдив «Возрождение Дербента» фондунин патай гьар вацра стипендия агакьда (пулунин кьадар тешкилатчийри кьилдин къарардалди тайинарда).
Муаллимрив дипломар ва пулунин пишкешар «Возрождение Дербента» фондунин крар идара ийизвай директор Саид Мусаева ва конкурсдин тешкиллувилин комитетдин председатель, алим Азиз Мирзебегова вахкана.
Муаллимрин кIвалахриз пуд касдикай ибарат жюридин векилри къимет гана: «Лезги газетдин» кьилин редактордин заместитель, Тахо-Годидин тIварцIихъ галай ДНИИП-дин хайи эдебиятрин сектордин илимдин къуллугъчи Куругъли Ферзалиева (жюридин председатель), Тахо-Годидин тIварцIихъ галай ДНИИП-дин хайи чIаларин сектордин илимдин къуллугъчи Жаклина Мейлановади, Гь. Къазиагьмедован тIварцIихъ галай педколледждин муаллим Рагнета Алибеговади.
Къейд ийин, ихьтин конкурс къведай йисузни кьиле тухудай къарар кьабулнава. Конкурсда иштиракай вирибуру тешкилатчийриз чухсагъул лагьана.
Лезги Фетгьуьллагь
