Гьамзатов Къайибулах Рагьметуллагьович 1985-йисуз Кьурагь райондин Кумухърин хуьре дидедиз хьана. 9-класс акьалтIарай ам Белиж поселокдин аграрный лицейдик экечIна. 2003-йисуз Къайибулахаз Россиядин Армиядин жергейра къуллугъ ийиз эверна. Ада Камчаткадин областда авай гьуьлерин флотдин базаяр нафтIадалди, бензиндалди ва соляркадалди таъминарзавай частуна къуллугъна. Са рехнени квачиз кьве йисуз къуллугъай ам военный частунин командованидин разивилин чарчиз лайихлу хьана.
КIвализ хтай са куьруь вахтунилай ам Белиждин ПМК-да кIвалахал акъвазна. Ахпа агрохимиядин базада водителвиле гьакъисагъвилелди зегьмет чIугуна. И вахтунда бубади хциз мехъерни авуна.
Чкадал кутугай кIвалах тахьуниз килигна, Къайибулах Москвадиз фена. Ина ада пассажирар тухудай улакьдал ва объектар хуьдайди яз зегьмет чIугуна.
2012-йисуз вичин багърийрин патав хтана, меслятна, ада Чечен Республикадин Гудермесда авай Росгвардиядин военный частунихъ галаз икьрар кутIунна, снайпер яз военный къуллугъдал акъвазна. Кьве йисалай адакай лишанчи хьана. Гуьгъуьнлай ам вичин рикI алай водителвилин пешедал ракъурна. Адан ихтиярда залан «Урал» машин туна.
Къайибулаха къуллугъзавай взводди Дагъустанда, Ингушетияда ва Чечняда кьиле тухвай терроризмдиз акси хейлин серенжемра иштиракна.
2018-йисан 8-ноябрдиз ам Сириядин Арабрин Республикадиз командировкадиз ракъурна. Ина Къайибулах Гьамзатова 2019-йисан февралдалди РФ-дин милли гвардиядин кьушунрик кваз ягъунар, акьунар авай Касайда, Аль-Ярмукда, Израда хаталу гьалара махсус везифаяр тамамарна.
Гьамзатова вичиз итижлу хьайи са кIвалахдикай икI лугьузва: «Сирияда шегьре рекьин са пата авай хуьрера дяве фенвайди ва муькуь пата дяведикай хабарни авачирди хьиз аквазвай. Малум хьайивал, рекьин са пата – сунитар, муькуь пата шиитарни алавитар яшамиш жезвай. Сунитар авай пата яшайишдин хейлин кIвалер ва социальный объектар акьунрин нетижада кукIварнавай. Шиитарни алавитар авай пата лагьайтIа, гуя ина акьунар хьайиди туш — вири дарамат сагъ тир ва абур адетдин къайдада яшамиш жезвай. Чи везифа, кьве патан арада акьунар жез гатIунайла, тади гьалда фена, абур сад-садавай къакъудун тир. Куьрелди лугьун: ана шиитрини алавитри сунитриз югъ гузвачир».
Сирияда хьайи вахтунда тактикадинни гьерекатдин дестедин командир, полковник И. Цуканова Гьамзатоваз ганвай къуллугъдинни женгинин характеристикада ихьтин гафар ава: «Вичин кар хъсандиз чизва, гьалар бейхабардиз дегиш хьайи вахтунда, вич-вичикай квахь тавуна, масадалай аслу тушиз, дуьз къарар кьабулзава. Къуллугъдин вахтунда ада вич савадлу, жавабдар аскер яз къалурна… Къуллугъдинни женгинин ва махсус везифаяр уьтквемвилелди тамамарна. Ам ведомстводин шабагь гуниз лайихлу я».
Интернациональный куьмек гунай ефрейтор Къ. Гьамзатов «Сирияда кьиле фейи военный серенжемдин иштиракчи» медалдиз ва хурудал алкIурдай Росгвардиядин лишандиз лайихлу хьана.
Сириядай хтанмазди, адаз отпуск гана. 14-февралдиз Къайибулах пара шадарай кар хьана: уьмуьрдин юлдаш Зияфата адаз кьуд лагьай велед – хва багъишна.
Отпускдин йикъар гьикI акъатнатIани чир хьанач… Къуллугъзавай военный частуниз хъфенмазди, къуллугъдин везифаяр тамамариз, ам терроризмдиз акси серенжем малумарнавай Ингушетиядин Алхастыдиз ракъурна. Ина адан хиве дагълара авай военный дестейриз яд, суьрсет, яракьар ва маса шейэр агакьарунин, хуьрера ачухнавай постарал акъвазунин ва военный объект хуьзвай къаравулчивилин везифаяр авай.
Терроризмдиз акси серенжемдин вахтунда жемиятдин къайдаяр хуьн таъминарунай Къ. Гьамзатоваз РФ-дин Милли гвардиядин кьушунрин федеральный къуллугъдин патай «Къуллугъда тафаватлу хьунай» 3 – дережадин медаль гана.
— 2022-йисан 22-февралдиз чи подразделение Крым Республикадин Армянск шегьердай Мелитополь галай патаз гьахьна, – суьгьбетзава Къ. Гьамзатова. – Чун физвай рекьин кьве патани миллетчийрин кукIварнавай техника, са тIимил кьван яргъаз фейила, кьенвай аскерар авай. Абур кьулухъ таз, чна виликди еримишна. ИкI чун женгер кьиле физвай майдандал акъатна. Рекьера авай телеф хьайибур акурла, лугьун хьи, зурзунни акатдай. Ахпа чир хьайивал, чун, рехъ алатна, къизгъин женгерин хуруз аватнавай. Чав залан яракьарни гвайди тушир. Ахпа малум хьайивал, ина вилик жергейра Миноборонадин частар хьана кIанзавайди тир. Чун иниз кьван акъатнавайдакай хабар хьайила, Миноборонадин патай тади буйругъ атана, чун кьулухъ элкъуьр хъувуна. Хтана, там квай чкадик акъвазна. МичIи хьайивалди, миллетчийри чун алай чка залан яракьрай ягъиз гатIунна. Чун генани кьулухъди хъфена.
Ина чун 40 юкъуз хьана. Пуд юкъуз чун недай суьрсет, яд авачиз амукьна. Къати аяз авай. Зи «Урал» машиндин кIуфар кукIвар хьанвай. Радиатордиз цадай яд авачиз, машин гьализ жезвачир. Ахпа зи рикIел дахди заз гайи насигьат хтана. Радиатордиз солярка цана, куьлуь ийиз, аниз муркIадин кIусар вегьена. Гьа икI, яваш-яваш чими хьайи соляркади мурк цIуруриз, машин худда тваз алакьна…
2022-йисан февралдилай гилалди Гьамзатова ДНР-да ва ЛНР-да махсус военный серенжемда иштиракзава.
2024-йисан январдиз женгера къалурай кьегьалвилерай ам Россиядин Федерациядин Милли гвардиядин кьушунрин федеральный къуллугъдин патай «Къуллугъда тафаватлу хьунай» 2 – дережадин медалдиз лайихлу хьана. Ам СВО-дин ветеранрин «Память гор» ассоциациядин – Дагъустандин региондин жемиятдин тешкилатдин векил я.
Хуьруьн агьалийривай чир хьайивал, алатай йисуз Къайибулаха жемятдин са месэла гьялуник кьил кутуна. Хуьруьнвияр «Дербент – Сергьят» электричкадал физвай рехъ лап татугай гьалда авай. И месэла гваз ам Кьурагь райондин кьилин патав фена. Замир Азизова гайи тапшуругъдалди неинки инсанар къекъвезвай рехъ къайдадиз гъана, гьакIни ракьун рекьел кьван машинар фидайвал, чиргъ вегьена, хъсан рехъ туькIуьрнава.
Гьамзатоври кьуд веледдиз тербия гузва. Зияфат вах кIвалин кайвани я. Аллагьди гайитIа, августдин вацра чIехи рушан мехъер жеда. ЧIехи гадади Дербентдин ракьун рекьерин колледжда кIелзава. Кьвед лагьай гададиз дахдин рехъ хкягъиз кIанзава. Ада Дербентдин кадетрин школада 5-классда кIелзава. ГъвечIи гада цIи 1-классдиз фида.
Къайибулах Гьамзатов хьтин викIегь рухваяр, СВО-дин вири иштиракчияр сагърай!
Чна квез, кьилел ислягь цав алаз, веледар бахтлу хьун ва рикIевай мурадрив агакьун алхишзава.
Къагьриман Ибрагьимов
