4-сентябрдиз къуватдихъ галаз алакъалу къурулушрин работникри Махачкъалада “Каспий” Упрдор ФКУ-дин республикадин филиалдин руководитель Мегьамедрасул Омаров кьуна. Идан гьакъиндай, Дагъустандин къуватдихъ галаз алакъалу къурулушра авай чешмедал бинеламиш хьуналди, ТАСС-ди хабар гана.
Республикадин прокуратурадин официальный сайтда хабар гузвайвал, Дагъустанда кьунвай “Каспий” Упрдор ФКУ-дин филиалдин руководитель Мегьамедрасул Омароваз талукь яз “Лутувал” статьядай уголовный дело къарагъарнава.
“Тайинарнавайвал, филиалдин руководителди коммерциядин организациядин генеральный директор, вичихъ автомобилрин рехъ тухун ва цIийикIа туькIуьр хъувун патал 2,7 млд манатдин госконтрактдин гьакъи тамамвилелди ва вахтунда гуниз таъсирдай мумкинвал ава лугьуз, алдатмишна”, — баян гузва малуматда.
Прокуратурадин делилралди, чиновникдихъ бизнесмендивай 680 миллион манатдин кьадарда аваз “откатар” къачудай ниятар авай. 2017-йисан декабрдиз ва 2018-йисан февралдиз ада карчидивай 60 миллион манатдилай виниз пул къачунай. Къанунсуз гьерекатар мадни давамарунин вилик пад къанун-къайда хуьдай органрин къуллугъчийри кьуна.
«Лезги газет»
