3-сентябрдиз Белиж поселокдин гимназиядин вилик квай майдандал терроризмдиз акси женгина рейсадвилин йикъаз талукьарнавай мярекат кьиле фена.
Ана Дербент райондин кьилин заместителар Сеидмегьамед Бабаева, Садир Эмиргьамзаева, Белиж поселокдин кьил Рамиз Гьабибулаева, райондин образованидин управленидин начальник Назира Мирзаевади, Дербент райондин имамрин председатель Адил-гьажи Къеибова, райондин терроризмдиз акси отделдин векилри, школайрин директорри, поселокдин агьалийри ва жаванри иштиракна.
Мярекат ачухай Сеидмегьамед Бабаева сентябрдиз Бесландин школада кьиле фейи бедбахтвилин вакъиаяр рикIел хкана.
— Къе Бесландин, Буденновскдин, Москвадин, Буйнакскдин ва Волгодонскдин са тахсирни квачир къурбандар ва чпин къуллугъ тамамардайла телеф хьайи къанун-къайда хуьдай органрин векилар рикlел хкидайла, — давамарна ада, — чун терроризмдиз акси акъвазунин карда рейсад я. — Неинки са властдин, гьакlни чи гьар садан везифа чи къвалав гвай гьар садан уьмуьр хуьн я. Чна, вири къуватар эцигна, террористриз экстремистрин идеологиядиз халис женг малумарна кIанда.
Анал рахай Садир Эмиргьамзаеван, Рамиз Гьабибулаеван, Назира Мирзаевадин гафаралди, ихьтин мярекатри уьлкведа ва дуьньяда кьиле физвай вакъиаяр кьатlуз куьмекзава, обществода ва уьлкведа кьиле физвай вакъиайрин гъавурда гьатунихъ игьтияж гегьеншарзава. Экстремизм ва терроризм негьдай тербиядин гьиссер гужлу ийизва.
Гимназиядин ученикри мярекатдиз талукьарнавай шиирар кlелна ва музыкадинни хореографиядин нумраяр къалурна.
Мярекат, са декьикьада кисна акъвазна, терроризмдихъ галаз женгинин гьерекатра телеф хьайибур рикlел хкуналди акьалтlна.
Къагьриман Ибрагьимов
