3-сентябрдиз Махачкъаладин кьилин майдандал терроризмдиз акси женгина рейсадвилин йикъаз талукь мярекатар кьиле фена ва абура Дагъустан Республикадин Кьилин везифаяр вахтуналди тамамарзавай Владимир Васильева иштиракна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Къайдаяр хуьдай органрин телеф хьайи къуллугъчияр рикIел хкунин мярекатда, гьакI РД-дин Халкьдин Собранидин Председатель Хизри Шихсаидова, РД-дин Гьукуматдин Председатель Артем Здунова, РД-дин Кьилин ва Гьукуматдин Администрациядин руководитель Владимир Ивановани иштиракна.
Сифте нубатда региондин руководителди чпин къуллугъдин везифаяр тамамардайла телеф хьайи къайдаяр хуьдай органрин къуллугъчийриз хкажнавай Мемориалдал цуьквер эцигна. РикIел хкин, ам Россиядин милициядин 90 йисан юбилей къейддайла ачухнай ва мармардин плитадал жуьреба-жуьре йисара чпин къуллугъдин везифаяр дирибашвилелди, жуьрэтлувилелди кьилиз акъудай ксарин тIварар, фамилияр кхьенва.
Республикадин руководителрихъ галаз санал Мемориалдал РД-дин Халкьдин Собранидин депутатри, хейлин министерствойрин, ведомствойрин руководителри, муниципальный тешкилатрин кьилери, къайдаяр хуьдай органрин къурулушрин векилри, гьа гьисабдай яз, Россиядин Силисдин комитетдин РД-да авай Силисдин управленидин руководитель Сергей Дубровина, республикадин прокурор Денис Попова ва МВД-дин министрдин заместитель Агьмед Баталиева цуьквер эцигна.
* * *
Гьа и юкъуз РД-дин Кьилин везифаяр вахтуналди тамамарзавай Владимир Васильева терроризмдиз акси женгина рейсадвилин йикъаз талукьарнавай республикадин акциядани иштиракна. Адахъ гьакI РД-дин Халкьдин Собранидин Председатель Хизри Шихсаидов, региондин премьер-министр Артем Здунов, РД-дин Кьилин ва Гьукуматдин Администрациядин руководитель Владимир Иванов ва РД-дин муфтий, шейх Агьмад Эфендини галай.
КIватI хьанвайбурун вилик рахадайла, В.Васильева террордихъ галаз алакъалу гьерекатди са тахсирни квачир вишералди инсанар телеф хьунал гъайиди рикIел хкана.
“Терроризмдихъ галаз чIугвазвай женгина неинки къайдаяр хуьдай органра, армиядин къурулушра ва махсус подразделенийра къуллугъзавай ксар, гьакI жергедин дагъустанвиярни телеф хьана. Террордин гьерекатар себеб яз хейлин муфтияр, кешишар, динэгьлияр уьмуьрдивай хьана. Абуру террордин вилик пад кьун, ислягь инсанар хуьн патал чпин чанар къурбандна. Террордин инсан такIанвилин идеологияди садазни инсафзавачир. И тIегъуьн анжах вири сад хьайила алудиз жеда. Гьелбетда, терроризмдал гъалибвал къазанмишунин карда Владимир Владимирович Путинан роль екеди я. 1999-йисуз Ботлихдиз атайла, ада Кавказ террордикай азад авунин гьерекатдик кьил кутунай”, — лагьана региондин руководителди…
…Вичин рахунар давамаруналди, В.Васильева Махачкъаладин кьилин майдан цIийикIа туькIуьр хъувун патал пулдин такьатар чара авунай Москвадин гьукуматдиз сагърай лагьана.
“Чна и майдан чешнелуди, гуьрчегди ийида. Виридалайни кьилинди, майдан цIийикIа туькIуьр хъувуниз талукь проектдикай гзаф инсанри веревирдер авуна, чпин теклифар гана. Зун инанмиш я, майдан меркездин агьалийри дамахдайди жеда”, — алава хъувуна В.Васильева.
Ада гьакIни къайдаяр хуьдай органрин телеф хьайи къуллугъчийрин хизанриз куьмекар гудайдини къейдна.
“Чна вирида и алем ва ислягьвал хвена кIанда. Чун садавайни магълуб тежедайдини рикIел хвена кIанда. Чи рагьметлу Игитриз баркалла!” — гьа ихьтин гафаралди куьтягьна региондин руководителди вичин рахунар.
«Лезги газет»