Дагъустандин меценатри республикадин школаяр дидед чIаларин учебникралди таъминарун патал 50 миллион манатдив агакьна пул чара авунва. Идан гьакъиндай муниципалитетрин образованидин управленийрин начальникрихъ галаз гуьруьшмиш хьайи чIавуз РД-дин илимдин ва образованидин министрдин сад лагьай заместителдин везифаяр тамамарзавай Ширали Алиева малумарна.
Пулдин такьатар 1-4-классра кIелзавай аялриз ругуд, гьа жергедай яз лезги чIалай учебникар къачун патал чара ийида.
“Дагъустан Республикадин бюджетда дидед чIаларай ва Дагъустандин литературадай учебникар маса къачун патал 20 миллион манатдин такьатар чара ийидайди къалурнава. А ктабралди тамамвилелди таъминарун патал и кьадар пул бес жедач. Гьа са вахтунда чпихъ гьал-агьвал авай, ери-бине Дагъустандай тир са жерге ксари сифтегьан школайра кIелзавай аялар милли чIаларай учебникралди таъминарун патал гуьгьуьллудаказ пул чара ийизва. Къенин йикъалди меценатрин гьисабдай алава яз 50 миллион манатдин пул чара авунва”, — хабар гана Ширали Алиева.
Къейд авун лазим я хьи, учебникралди таъминарун патал республикадин бюджетдай, санлай къачурла, 220 миллион манатдин такьатар чара ийида. Идакайни 200 миллион манат федеральный компонентдин ктабар маса къачуниз акъатдай харжияр арадал хкун патал серфда.
Министерстводихъ авай делилралди, республикадин анжах 58 процент школаяр ктабралди тамамвилелди таъмин я. Месела гьялун патал алава такьатар РФ-дин Гьукуматдин резервдин фондунай 2019-йисан сифте кьилера чара ийида.
«Лезги газет»
