Къе заз жуван муаллим ва насигьатчи Жамал Азизович Шефиев рикIел хкиз кIанзава. И машгьур ватанэгьли, РСФСР-дин культурадин лайихлу къуллугъчи, «Сейливилин лишан» ордендин, «Россиядин ватанперес» тIварцIин сагьиб дидедиз хьайидалай инихъ 12-майдиз 97 йис тамам хьана. Ватандин ЧIехи дяведин иштиракчи хьайи Жамал Азизовича дяведин йисарилай гуьгъуьниз 58 йисуз халкьдиз медениятдин хиле къуллугъна.
Ам ДАССР-дин Верховный Советдин ва РД-дин Госсоветдин патай сейливилин грамотадиз кьве сеферда лайихлу хьана. Ада гзаф йисара Ахцегь райондин дяведин ветеранрин советдин председателвал авуна. РД-дин президентдин патай адаз тIвар кхьенвай сят кьве сеферда пишкешна. РФ-дин ВМФ-дин главнокомандующий, флотдин адмирал В.И.Куроедова адан агалкьунар сейли шабагь гуналди къейднай. Медалар ва маса шабагьар адахъ мадни гзаф ава.
Жамал Шефиеван лайихлувилеринни алакьунрин гьакъиндай шагьидвалзавай мад са итижлу делил ам я хьи, адав 19 йисуз галаз-галаз ДАССР-дин культурадин министерстводин ва ДАССР-дин культурадин къуллугъчийрин профсоюздин обкомдин гъиляй-гъилиз фидай Яру Пайдах вахкана. Чавай гьахълудаказ лугьуз жеда хьи, ам культурадин пайдах кьакьан дережайриз хкажай, вичи арадал гъайи цIийивилер уьлкведин культурадин министерство патал хъсан чешнедиз элкъвей ватанэгьли тир. Ада медениятда кьил кутур хъсан крар СССР-дин вири мулкара чарасуздаказ кардик кутуна. Республикада медениятдин хиле кIвалахзавай жавабдар хейлин ксари адан кIвалахдин тежриба чирна.
Ахцегьрин агьалийри Жамал Азизович Шефиев рикIера хуьзва.
Н. Тажибов,
Ахцегь райондин ЦБС-дин виликан директор
