СФР-дин Дагъустанда авай отделенидин пресс-къуллугъдин малуматдалди, къенин юкъуз Дагъустанда кIвалахзавай 14 агъзурдалай виниз агьалийри йисни зур (1,5) тамам жедалди аялдихъ гелкъуьнай пособие къачузва. Йисан эвелдилай и рекьиз СФР-дин Дагъустанда авай отделениди 432 миллиондилай виниз пулдин такьатар серфнава.
РикIел хкин, йисни зур тамам жедалди аялдихъ гелкъуьнай пул къачудай ихтияр неинки дидедиз, гьакIни бубадиз, аялдихъ гелкъвезвай багъридиз, мукьва-кьилидиз ва я къаюмвалзавайбурузни ава.
КIвалахзавай дидедиз ва я бубадиз пул аялдихъ гелкъуьнай отпускдихъ галаз санал тайинарзава. Гьа са вахтунда кIвалах тийизвай ксари и пул тайинарун патал Яшайишдин фондунин отделенида арза ва са жерге документар гун герек я. Ихьтин документрик акатзава: пул тайинарзавай аял хунин ва я хвавиле-рушвиле кьабулунин гьакъиндай шагьадатнама, эгер хизанда мад аялар аватIа, абурун шагьадатнамаярни, эгер пул дидедиз тайинарзаватIа, бубади кIвалахзавай чкадай ада аялдихъ гелкъуьнай отпуск ва пул къачузвачирди тестикьарзавай справка (пул бубадиз тайинариз хьайитIа, дидеди кIвалахзавай чкадай ихьтин справка къачуда). Мадни дидеди ва я бубади кIвалахзавачтIа, Яшайишдин фондунин отделенидай и кар тестикьарзавай справка къачун лазим я. ГьакIни лазим документрик зегьметдин книжка (эгер аваз хьайитIа) ва кIвалахдал таъминардай центрадай пособие къачузвачирди тестикьарзавай справкани счётдин реквизитар акатзава.
Къейд авун лазим я хьи, кIвалах тийизвай дидедиз ва я бубадиз аялдихъ гелкъуьнай пул эгер абурухъ игьтияж аваз хьайитIа гузва. И карни абурун къазанжияр ва эменни фикирда кьуналди кьилиз акъудзава.
Рагнеда Рамалданова
