Дяве. Гьикьван рикIиз савух залан гаф ятIа аку садра… Дяве – им кьиникьар, шел-хвал, харапIаяр, етимар, еке мусибат я. Зун, Ватандин ЧIехи дяведилай кьулухъ ирид йис алатайла, Докъузпара райондин Къаракуьре хуьре дидедиз хьана. Зун дяведин иштиракчийрихъ галаз суьгьбетар авур кас я.
Дяве куьтягь хьайила, зи буба Къадиров Султанан 17 йис тир. Адахъ вичелай гъвечIи кьве стхани са вах авай. Ада дяведин йисарин четинвилер, туькьуьлвилер, каш-мекь — вири эхна. А йикъарикай заз ада гзаф суьгьбетарнай.
А дяведи чи тухумдизни еке зиян гана. Чи тухумдай пуд касди — дяведа, кьуд касдини зегьметдин фронтда иштиракна. Абур вири са кIвалера, са къавун кIаник яшамиш жезвай. Дяведин эхирдай 7 касдикай амукьайди са Имирбег буба тир, амни фронтдай кIекIецрал алаз хтана. Амай чи чIехи бубаяр, дяведин эхир такуна, азиятрик рагьметдиз фена. Абурун уьмуьрдин юлдашрикай хендедаяр хьана. А завал чалай алатна гзаф йисар хьанватIани, гила мад чаз душманар пайда хьанва. Чун абурун хура акъвазуниз мажбур жезва.
Къаракуьредай исятда гзаф жегьилри СВО-да иштиракзава. Абурун арада зи багъриярни ава. Зи имидин, стхадин веледар — Къадировар: Минабидин, Самидин, Алимегьамед, Жабраил.
Чи тухумда муьжуьд офицер ава, абурукай кьвед полковникар я. Амма къе заз жергедин аскеррикай рахаз кIанзава. 2005-йисалай Къадиров Минабидина икьрар кутIунна, Чечняда къуллугъзавай. Украинадин миллетбазри кьил хкажиз башламишай 2014-йисуз абурун са десте Крымдиз рекье туна, ана къайда хуьн патал. Адан эхир гьикI хьанатIа, чаз виридаз чизва – Крым Россиядик эхкечIна. Минабидина 2022-йисалди аскервилин везифаяр тамамарзавай. Амма СВО гатIунайдалай кьулухъ ада къенин йикъалди Запорожьедин терефдин женгера иштиракзава ва вичин везифаяр баркаллудаказ кьиле тухузва. Сержант, отделенидин командир Минабидинан хурудал 7 медалди нур гузва. Абурун арада «Женгера тафаватлувилерай», «Женгинин баркаллувиляй» I-II дережайрин ва Жукован медаль ава.
Штурмовик Минабидинал кьве сеферда хирер хьана. Эхиримжи хер заланди тир. Госпиталда хьайидалай кьулухъ ам са вацра отпускдиз ахъайна. Чна ви дяве куьтягь хьана лагьайла, Минабидина ваъ лагьана ва давамарна: «Залайни залан хирер хьайибур элкъвена хъфизва чпин частариз. Исятда кьил къакъудун кутугнавай кар туш. Идалай алава, зи хва Жабраилни гьазур хьанва. Гьамни галаз хъфида зун». Хъфена абур. Гила са батальонда ава.
Жабраила сифте йикъарилай вич викIегь аскер тирди субутна. Ада са шумуд хуьр азад хъийидай женгера иштиракна. Рободино хуьряй миллетчияр акъудун патал минометчикри кIвалахна кIанзавай. Душмандал минаяр ракъурзавай Жабраила устадвилелди вичин везифа тамамарзавай. Кар авурдалай кьулухъ абур тадиз чеб алай чка дегишариз алахъна. Амма нацистрин дронри кьуд кас авай машин яна. Кьве кас телеф хьана, Жабраилни мад са аскер госпиталдиз аватна.
Дяведа ихьтин дуьшуьшар тIимил жезвач. Къадиров Жабраилан викIегьвилер «Дяведин серенжемдин иштиракчи», «Женгера тафаватлувилерай» ва Суворован медалралди къейднава.
Гила чун Къадиров Алимегьамедакай рахан. Россиядин армияда вичин буржи тамамарайдалай кьулухъ ада УИН-да, ахпа са шумуд йисуз МЧС-да кIвалахна. Заз лугьуз кIанзава хьи, Алимегьамед рикIе кичIевал авачиз вердиш хьанва. Ам 2024-йисуз гуьгьуьллувилелди СВО-диз фена. Ада командирри вилик эцигай тапшуругъар кьилиз акъудзава. Ада сифте Луганскда штурмовик яз къуллугъна, ахпа Харьковдин областдин мулкара зенитчик яз.
Самидина икьрардин бинедаллаз Чечняда къуллугъзавай. СВО башламишайдалай кьулухъ ам анин иштиракчи я, ада разведкада къуллугъзава.
Чи мурад, дяве куьтягь хьана, СВО-да авай вири кьегьалар сагъ-саламатдиз кIвалериз хтун я. Амин!
* * *
Советрин Союз фашистрикай хуьдай женгера кьегьалвилер къалурай къаракуьревияр садни кьвед туш. Гьукуматдин чIехи шабагьриз Советрин Союздин Игит Мирза Велиев, дивизиядин командир Хийирбег Заманов, ротадин командир Абдурашид Наврузов, дагъви руш Ханбике Наврузова, викIегь разведчик Сейфедин Абдулкеримов ва масабур лайихлу хьана.
Винидихъ кхьенвайвал, Къадироврин тухумдай фронтда Гьажикъулиди, Мурсала, Эмирбега немсерихъ галаз женгер чIугуна. Къадира, Жалила, Закарьяди, Гьамида Кавказдихъ гьерекатзавай фашистрин кьушунриз акси сенгерар туькIуьрунин карда иштиракна. Гьайиф хьи, дяведай сагъ-саламатдиз хтун анжах са Эмирбег Къадироваз кьисмет хьана.
Гитлеран Германиядал гъалибвал къазанмишайдалай инихъ 81 йис алатнава. Дяведин иштиракчийрин рухвайри, хтулри, птулри, къе ватандиз, чпин бубайрин тIварар вине кьуна, къуллугъзава. Абурун арада ава: ФСБ-дин центральный аппаратдин полковник Шайдабег, РД-дин УИН-дин начальникдин заместитель, полковник Закарья, УИН-дин отделдин начальник, подполковник Мейлан, МВД-дин офицерар Саламудин, Рамис, Герман, Руслан, Надир, Вадим, Камал, ФСБ-дин къуллугъчияр Мурсал, Салигь, СВО-дин иштиракчияр тир Зейнал, Минабидин…
Ватандин къуллугъда акъвазнавай рухвайриз анжах аферин къвезва.
Къадир Къадиров
