Векьелар ЯркIи ва Кьурагь дерейрин ажайибвилер, Куьредин гзаф хуьрер ва Каспий гьуьлуьн майданар капун юкьвал алайбур хьиз аквадай тепедал ала. Хуьр вич лагьайтIа, вири патарихъай векьин чуьллери элкъуьрна кьунва. Хуьруьн тIварни «векь» гафуникай арадал атанвайди яз гьисабзава: «векьелар» – гзаф векь авай чка.

1886-йисан переписдин делилралди, хуьре 91 майишат авай ва 472 кас (251 итим ва 221 дишегьли) яшамиш жезвай.

Хуьруьн къерехра иер чкаяр гзаф ава. Хуьруьвай рагъэкъечIдай патахъ 100 метрдин мензилда архитектурадин памятник – цин чешме ава, хуьруьн кефер патан магьледа – куьгьне мискIин.

1970-йисалди Векьелар Алкьвадрин хуьруьн советдик квай. Векьеларвийрикай чIехи пай Кьулан СтIалдал куьч хьана ва ана чпин кIвал-югъ кутуна.

Мурад Мегьамедкеримован

«СтIал Сулейманан район: ­тарихдин гелерай» ктабдай.