Мергьяматлувилин «Возрождение Дербента» фондуни Дербент шегьердин мектебра тарсар гузвай лезги чIаланни эдебиятдин лап хъсан муаллимриз кIелунин 2026/2027-йисуз гьар вацра стипендия гунин къарар кьабулнава. Стипендия къачудай муаллимар тайинарун патал эвелни-эвел «Дербент шегьердин лезги чIалан лап хъсан муаллим» махсус конкурс кьиле тухудайвал я.
Конкурс алай йисан 16-майдиз СтIал Сулейманан тIварцIихъ галай лезгийрин госмуздрамтеатрдин дараматда (сятдин 11-даз) кьиле фида ва нетижаярни гьа юкъуз кьада. Муаллимри лезги чIалазни эдебиятдиз талукь тестер, жуьреба-жуьре тапшуругъар тамамарда.
Тафаватлу хьайи 6 муаллимдиз пулунин пишкешарни дипломар гуда. Кьилди къачуртIа, гъалибчи патал 20 агъзур манатдин кьадарда аваз пулунин пишкеш тайинарнава. 2-чкадай (2 муаллимдиз) гьар садаз 15 агъзур манат гуда, 3-чкадай (3 муаллимдиз) — гьар садаз 10 агъзур манат.
Стипендиядин кьадар ва ам гунин къайда гуьгъуьнлай тешкилатчиди кьилдин къарардалди тайинарда.
Салим Салимов
