Артух хьанва
2025-йисуз Дагъустанда вирт гьасилунин кьадар тахминан 1326 тонндив агакьна. Им, виликан йисарив гекъигайла, тахминан 300 тонндин гзаф я. Идакай РД-дин хуьруьн майишатдин ва недай суьрсетдин министерстводин сайтда раижзава.
И суьрсет гзафни-гзаф ЛПХ-айра гьасилнава – саки 1150 тонн, КФХ-айрал ацалтнавай пай 133 тонндикай ибарат я. Хуьруьн майишатдин тешкилатра лагьайтIа – 43 тонндилай гзаф.
Республикада куьнуьйрин кьадар гзаф хьун 2026-йисузни аквазва. ИкI, йисан эвел кьиляй хуьруьн майишатдин тешкилатра 4 агъзурдалай гзаф куьнуьяр ава. ГъвечIи хьтин чкайра ва фермервилин майишатра лагьайтIа, — 101 агъзур куьнуьдилай гзаф.
Къейд ийин хьи, идалай вилик РД-дин хуьруьн майишатдин ва недай суьрсетдин министерстводин сайтда Дагъустанда 2026-йисуз республикадин бюджетдай чIижерхъанвал еримлу авун патал 10 миллион манат чара ийидайдакай ва субсидияр къачун патал документар мартдин вацралай кьабулдайдакай хабар ганай.
Чешмеди раиж авурвал, хуьруьн майшатдин метягьар акъудунал машгъулбурувай гьукуматдин куьмекдин такьатар ихьтин серенжемар кьиле тухуниз харж ийиз жеда: алай девирдин тадаракар маса къачуниз, вирт гьялуниз ва ам къапара туниз, куьнуьчивилин хиле герек къведай алатар, затIар цIийи авуниз ва икI мад.
Рекьер туькIуьр хъувуникай
27-28-мартдиз ва 4-5-апрелдиз Дагъустандин мулкара къати марфар къуникди 33 муниципалитетда рекьерин 160 участокда автомобилрин гьерекат вахтуналди агалнай (ва я анра улакьривай четиндиз физ жезвай). Идакай «Дагестанавтодор» идарадин телеграм-каналди хабар гузва.
Чешмеди раижзавайвал, чIуру гьалар арадай акъудун патал а чIавалай инихъ хейлин кIвалахар кьиле тухванва. 10-майдин делилралди ихьтин гьалар ава:
– рехъ кардикай хкатна, физ тежезвай хуьрер амач;
– 16 участок кIевнава, амма элячIна фидай рехъ ава;
– вири хилера лазим кIвалахар кьиле тухузва;
– 144 участокда автомобилрин гьерекат арадал хканва.
Хабар гузвайвал, къати марфар къунин чIуру нетижаяр арадай акъудун патал 160 участокда, 102 уьлчмедилай гзаф махсус техника (бульдозерар, экскаваторар, КДМ, автогрейдерар…) ва рекьерал кIвалахдай 303 фяле кардик кутуна. Алай вахтунда участокар туькIуьр хъувунин серенжемар давамарзава. КIвалахда рекьерин 65 уьлчме техникади ва 108 фяледи иштиракзава. ТуьхкIуьрунин кIвалахар кьиле тухун патал герек тир къуватар ва такьатар авазва.
Чешмеди гьа са вахтунда агьалийриз чарасузвал авачиз дагъдин районриз рекье гьат тавуниз эвер гузва. Къейдзавайвал, яргъалди марфар къунихъ ва чилер лап ламу хьунихъ галаз алакъалу яз, кьакьан дагъдин районра уьцIуьнар хьунин, къванер, живедин маргъалар авахьунин къурхулувал амазма.
Дуьгуь агакьарнава
Дагъустанди 2026-йисан 1-кварталда 730 тонндилай гзаф дуьгуь экспорт авунва. Идакай РД-дин хуьруьн майишатдин ва недай суьрсетдин министерстводин сайтда хабар гузва.
Кьилди къачуртIа, чешмеди къейдзавайвал, Дагъустанди 2026-йисан сифтегьан пуд вацра, къецепатан уьлквейриз 730 тонн дуьгуь ракъурнава, гьа гьисабдай яз – Туьркиядиз, Азербайжандиз ва Таджикистандиз.
Дагъустандин дуьгуь маса уьлквейрив агакьарунин серенжем вад йисуз ара гайидалай кьулухъ Къизляр райондай 40 тонн «лацу техил» Азербайжандиз рекье турла, 2025-йисан эхирра гатIун хъувунай.
Рекъемар раижзава
Дагъустандин хуьруьн майишатдин карханайри 2026-йисан 1-кварталда чIехи карч алай 5 агъзурдалай гзаф ва гъечIи карч алай 6 агъзур гьайван, гьакIни 249 тонн хипен як, 270 тонн балугъ ва 21 тонн сар экспортдиз ракъурнава. Идакай РД-дин хуьруьн майишатдин ва недай суьрсетдин министерстводин сайтда хабар гузва.
Чешмеди къейдзавайвал, агропромышленный комплексдин продукция экспорт авунин рекьяй Дагъустандин амадагар ибур я: Азербайжан, Узбекистан, Белоруссия, Грузия, Индия ва Иордания. Метягьар гьакIни Иракдиз, Къазахстандиз, Къиргъизистандиз, Ливандиз, ОАЭ-диз, Таджикистандиз ва Туьркиядиз рекье твазва.
2026-йисан сифтегьан кьве вацра республикади Узбекистандиз хипен як, Азербайжандизни Узбекистандиз балугъар рекье тунин кьадар артухарнава.
Гьазурайди – М. Агьмедов
