Чи ватанэгьлияр – гьар сана
Илимдин рекье агалкьунар къазанмишнавай мад са жегьил алимдикай и йикъара чав хабар агакьна. Ихтилат вичин ери-бине Шалбуз дагъдин ценерив гвай Текийрин хуьряй (Докъузпара район) тир Камиль Розманович Ражабовакай я. Ам 1998-йисуз Розмананни Гуьлнарадин хизанда Махачкъала шегьерда дидедиз хьана.
Камиль шегьерда чIехи хьана, 2008-2015- йисара ада республикадин гзаф терефрин лицейда физикадизни математикадиз майилвал авай классда кIелна. Вич кьетIен чирвилер авайбурун жергедай тирди ада 2015-йисуз тарихдай Вирироссиядин школьникрин олимпиадада гъалибвал къачуналди успатна.
2019-йисуз ада РФ-дин къецепатан крарин министерстводин гуьзчивилик квай МГИМО-дин (Московский государственный институт международных отношений) халкьарин арада алакъайриз талукь факультет акьалтIарна, 2021-йисуз – магистратурада прикладной экономикадин факультет.
Студентвилин йисарани ам чирвилерин жигьетдай амайбурулай тафаватлу хьана: обществознанидай, праводайни тарихдай 11 сеферда олимпиадайра (МГИМО-дин, МГУ-дин, Экономикадин кьилин мектебдин, СПбГУ-дин ва маса вузрин олимпиадаяр) гъалибвал къачуна.
Яру дипломдалди МГИМО акьалтIарайдалай кьулухъ Камиль Ражабов государстводин «Ростех» тешкилатда кIвалахал акъвазна. Алай вахтунда чи ватанэгьлиди и машгьур корпорацияда, «Россиядин вертолетар» подразделенидин къецепатан уьлквейрин заказчийрин хилез регьбервал гуналди, агалкьунралди зегьмет чIугвазва.
Жавабдар кIвалах кьилиз акъудунилай гъейри, ада илимдин кукIушар муьтIуьгъарунин рекьени кагьулвал ийизвач: Азиядин, Африкадин ва Ближний Востокдин уьлквейрихъ галаз авиациядин жигьетдай индустриядин амадагвал еримлу авунин месэлайриз талукь илимдин кIвалах гъиле кьуна ва кьилиз акъудна. Алай йисан мартдиз Камиль Ражабова МГИМО-да «Международные бизнес-стратегии российских компаний авиационной промышленности в контексте формирования производственно-технологических экосистем» темадай кхьей диссертация хвена ва экономикадин илимрин кандидатвилин дережа къачуна.
Жегьил алимдиз чна и дережа мубаракзава. Къуй адахъ кIвалахдани илимда мадни еке агалкьунар хьурай!
К. Ферзалиев
