Чаз къе малум тир тарихдин ватанпересвилин делил ам я хьи, Гитлеран, фашистрин Германиядин инсафсуз кьушунрикай Советрин ватан хуьнин ва нацистрал гъалибвал къачунин женгерик, фронт герек шейэралди, суьрсетдалди таъминарунин кардик гьар са хизанди, хуьруь чпин пай кутуна.
Хив райондин Хъукьварин хуьряй фронтдиз 86 кас фена. Исаеврин хизандай – кьуд, Тагъиеврин, Эмирбеговрин, Эмиргьамзаеврин, Сурхаеврин, Къафароврин, Рамалдановрин хизанрай – кьве-кьве стха. Вирида, душмандин хура акъвазна, адаз рикIелай тефидай ягъунар кьуна.
Хъукьвавийри женгерин майданра, фашистрал гьужумдайла, кьетIен викIегьвилер къалурна. Сержант Эмирбегов Загьибеган кьегьалвилер гьукуматдин 12 ордендалди ва медалдалди къейдна. Гвардиядин майор Къурбанов Зиявудин 11 шабагьдиз лайихлу хьана. Старшина Рамалданов Нурудиназ 9 ва сержант Тагъиев Тагьиразни 9 орденни медаль авай.
ЧIехи гъалибвилик вичин пай Атлу Ярметовани кутуна.
Фашистрикай ватан хуьз фейила, Атлу Ярметован 18 йис тир. Ада пияда кьушунра къуллугъна. ВикIегь аскерди, Сталинград хуьдайла, фашистрин кьушунар элкъуьрна гьалкъада твадайла, абур машгьур шегьердай чукурдайла, Днепр вацIалай элячIдайла, Украина азаддайла ва хейлин маса женгера иштиракна. Адан жуьрэтлувал, дирибашвал, игитвал гьукуматди гайи шабагьри тестикьарзава. ВикIегь аскердиз женгерин юлдашри «Атаман» тIвар ганай. Гьатта бязи документрани адан тIвар Атаман яз къалурнава. Ватандин вилик Атлу Ярметован лайихлувилер Яру Гъед, Яру Пайдах, Ватандин дяведин 1-дережадин, Кутузован орденралди, «Женгера тафаватлу хьунай», «Берлин къачунай», «Германиядин винел гъалиб хьунай» ва маса медалралди къейднава.
Дяведилай гуьгъуьниз Атлу Ярметова кьилин образование къачуна, хайи хуьруьн ва Къаякент райондин Дружбадин школайра кIвалахна, акьалтзавай несилдиз чирвилер, тербия гана. ВикIегь хва Атаман 2006-йисуз рагьметдиз фена.
Абад Азадов
