1-Майдиз чи уьлкведа Гатфарин ва зегьметдин сувар къейдзава. Россиядин Федерациядин Зегьметдин кодексдик 112-статьядал асаслу яз, и югъ гьар йисуз кIвалах тийизвайди яз малумарзава.

Адет яз, 1-Майдиз уьлкведин жуьреба-жуьре шегьерра суварин шадвилериз талукьарнавай мярекатар кьиле тухузва. Суварин гьакъиндай ихьтин мярекатар Дагъустандани гьар йисуз тешкилзава.

1-Майдин суварин тарихдиз вил вегьейла якъин жезвайвал, адан кьилин макьсад лежберар, зегьметкешар тебрик, абурун агалкьунар къейд авун я. Уьлкведин экономика, яшайиш, культура, уьмуьрдин вири хилер вилик фин зегьметчи халкьдилай аслу я. Сувариз “Гатфарин ва зегьметдин” тIвар гунни дуьшуьшдин кар туш. Им гьакъикъатдани зегьметчийрин сувар я.

Чна чи ватанэгьлийриз 1-Майдин сувар рикIин сидкьидай мубаракзава. Къуй квехъ, играмибур, кIвалахдин рекье еке агалкьунар, хизанра шадвилер, бахтар хьурай! Вири инсаниятдик къурху кутазвай дявеярни фад-фад акьалтI хьурай. Вири цицIи ва дири хьурай! Амин!

«Лезги газетдин» редакциядин коллектив