Ахцегь райондин Хуьруьгрин там Кьиблепатан Дагъустанда Самурдин кьаскьандив экIя хьанвай шамагъаждин тарарин чIехи ва гуьзел чка я. Фан-яд, Тамун вир, Цуругърин чарчар ва лишанлу маса чкайралди машгьур ам иллаки эхиримжи вахтунда кьуд патай ахмиш жезвай туристри рикI аладарун ва ял ягъун патал хкязава.
РикIел хкин, шаз,15-мартдиз, инсандин саймазвал себеб яз, и таму цIай кьунай ва 5 йикъан къене, дагъдин четин шартIара махсус техника ишлемишиз, цIай сакIани хкадариз тежез, гьайиф хьи, 22 гектардилай артух надир там канай. Месэла гьа макъамда республикадин регьбер Сергей Алимович Меликова вичин гуьзчивилик кутунай, там арадал хкидай къарар кьабулнай.
А чIавуз РД-дин Халкьдин Собранидин депутат Имам Яралиева вичин патай шамагъаждин герек кьадар къелемар гун хиве кьунай. «Ахцегь район» муниципалитетдин кьил Абдул-Керим Палчаеван регьбервилик кваз 2025-йисан ноябрдиз районэгьлийри мелерин къайдада 800 къелем цанай.
Разивилелди къейд ийин, дагъдин надир там арадал хкунин кIвалахар гъилевай йисузни давам жезва. ИкI, 18-апрелдиз, кьиле Абдул-Керим Палчаев ва РД-дин тамарин майишатдин Комитетдин кьил Вагьаб Абдулгьамидов аваз, райондин хуьрерин администрацийрин, идарайринни карханайрин коллективрин дестеяр, къунши районрин тамарин майишатрин коллективар, гьакI 400-дав агакьна районэгьлияр, гъиле перер аваз, чпин хушуналди там хуьнин субботникдиз экъечIна. Абурун арада тежрибалу агъсакъаларни, школьникарни, гьатта яшлу дишегьлиярни кваз авай.
Аллагьди яргъазрай, хата-бала хьайитIа лагьана (кIвалах кьакьан дагъдин тик четин чкайра ийизвай), тади куьмекдин къуллугъни кIвачел алай. Вири крар саламатдиз кьиле фена. Умуми къуватралди жемятди тамун иллаки гзаф хасаратвал хьанвай чкайра 5 агъзурдав агакьна шамагъаждин къелемар цана. Къелемралди республикадин «Даглесхозди», тамарин майишатдин Комитетди ва РД-дин Халкьдин Собранидин депутат И.М. Яралиева таъминарна.
Лугьун хьи, паталай куьмекиз атанвай мугьманарни авай. Чна Кьурагь райондин векилрихъ галаз суьгьбетна:
– Герек атай макъамда сада-садаз куьмек тийиз хьайитIа, чун гьихьтин къуншияр хьурай?! Къе ина ахцегьвийрихъ галаз санал чна – Кьурагь, Рутул, Мегьарамдхуьруьн, СтIал Сулейманан районрин тамарин участокрин пешекаррини кIвалахзава. Кьилди къачуртIа, чна, Кьурагьрин тамун участокдин инспекторар тир Мадрид Шагьбанова, Рафидин Батманова, Альберт Селимова дагъдин шамагъаждин 120 къелем гъана цанва…, – лагьана абуру.
Абдул-Керим Палчаева тIебиатдин багьа къаш тир Хуьруьгрин там хуьнин мелера иштиракай вирибуруз чухсагъул лагьана.
Дашдемир Шерифалиев
