22-апрелдиз Махачкъалада, тарихдин «Россия – зи тарих» паркунин чIехи залда, тарихдин илимрин доктор, профессор Замир Шагьбанович Закарияеван «Мусульманская эпиграфика Южного Дагестана. Том I. Надписи Ахтынского района» ктабдин презентация кьиле фена.
Мярекатди неинки са тарихдал рикI алайбур, гьакIни жемиятдин жуьреба-жуьре хилерин векилар кIватIнавай. Гьуьрметлу мугьманрин арада РД-дин Гьукуматдин Председателдин заместитель Нариман Абдулмуталибов, РАН-дин востоковеденидин институтдин Центральный Азия, Кавказ ва Урало-Поволжье ахтармишунин рекьяй кардик квай центрадин заведующий Владимир Бобровников, ДГУ-дин востоковеденидин факультетдин декан Артур Омаров, «Лезги газетдин» кьилин редактор, Алкьвадар Гьасанан тIварцIихъ галай медениятдинни марифатдин центрадин директор Мегьамед Ибрагьимов, Дагъустандин писателрин союздин лезги секциядин регьбер Максим Алимов ва масабур авай.
Вичин рахунра Нариман Абдулмуталибова къейд авурвал, Кьиблепатан Дагъустандихъ эпиграфикадин девлетлу ирс ава ва ам ахтармишуник чIехи пай кутунвай алимрикай сад Амри Шихсаидов я. Вице-премьердин гафаралди, Амри Рзаевича кьил кутур кIвалахар чи йикъара профессор Замир Закарияева баркаллувилелди давамарзава, цIийиз акъатнавай ктабдини и кар нубатдин сеферда тестикьарзава.
Русский географический обществодин Дагъустанда авай отделенидин председателдин заместитель Амиль Саркарова кьиле тухвай мярекатдин сергьятра ава, рахайбуру Замир Закарияева гьазурнавай ктабдихъ неинки са лезгийрин, гьакIни вири Дагъустандин тарих патал еке метлеб авайди къейдна.
Гьакъикъатдани гьакI я. Лезгийрин мисалда лугьузвайвал, дувул галачир тар ярх жеда. ИкI тахьун патал дувулар сагъдиз хуьн важиблу я. Халкьни гьакI я. ЧIални тарих, бубайрин адетар хвенвай халкь къадимлу жеда. Замир Закарияева, Ахцегь райондин саки вири хуьрера къекъвена, мискIинрин, жуьреба-жуьре дараматрин цлара, сурара авай чпел кхьинар атIанвай къванер «рахурна» лагьайтIа жеда. Ада, санлай къачурла, эпиграфикадин 500-далай виниз гуьмбетар ахтармишнава. Абурун арада гьатта 11 лагьай виш йисариз талукь чешмеярни ава. Шукур хьурай Аллагьдиз, гена къванерал атIанвай кхьинар тIебиатдин мишекъат шартIара терг хьанач. Абур тарихдин халис шагьидар я ва гьар сада тайин са вакъиадикай хабар гузва.
Замир Закарияева презентациядал къейд авурвал, ада Кьиблепатан Дагъустандин эпиграфикадин ирс ахтармишунин рекьяй кIвалах давамарзава. Мукьвара чапдай акъатдай кьвед лагьай ктаб Кьурагь райондин эпиграфикадин гуьмбетриз талукьарнава. Чна гьуьрметлу профессордиз цIийи ктаб акъатун рикIин сидкьидай мубаракзава. Къуй адахъ чандин сагъвални яргъи уьмуьр хьурай – чи халкьдин тарихдин цIийи чинар винел акъуддайвал.
Агьмед Магьмудов
