И йикъара Кьасумхуьруьн аялрин яратмишунрин кIвале республикадин «Зи ужагъ, хайи Дагъустан» лишандик кваз Россиядин халкьарин садвилиз бахшнавай художественный самодеятелрин конкурс кьиле фена. Сад лагьай синифдилай башламишна еке сегьнейра лезги шаиирин ширар хуралай кIелзавай ва ихьтин конкурсра хъсан чкаяр кьазвай, дипомрин, грамотайрин сагьиб Мансур Нуралиевани и конкурсда иштиракна.

Гьамиша «Кард»  журнал кIелзавай ва журналдин чинра гагь вичин шиирар, гагь гъили чIугунвай шикилар гузвай, гьакIни «Лезги газетдани» шиирар акъатнавай Цмурин юкьван мектебдин кьуд лагьай синифда кIелзавай Мансур Нуралиева нубатдин конкурсда  ансамблдин дестедихъ галаз вичин далдамчивилин гьунар къалурна.

Мансуран  фикирар гила музыкадихъ элкъвенва. Ам гьамиша яратмишунрин гьар жуьре рекьерай вичин рикIиз хуш жигъирриз физвай аял  я. Къуй ам вичин вири мурадрив агакьрай — амай аяларни галаз!

Заз гьамиша хатурлу я бицIи, амма руьгьдиз чIехи Мансур.

Бикеханум Алибегова