И йикъара Минеральные Воды шегьерда Кавказдин инвестицийрин форум кьиле физва. 30-апрелдиз акьалтIзавай и чIехи мярекат СКФО-дин экономикадин уьмуьрда лишанлубурукай сад яз гьисабзава.
Адет тирвал, форумда Дагъустандини иштиракзава, республикадин делегациядиз региондин Кьил Сергей Меликова регьбервал гузва. Форумдин сергьятра аваз, Дагъустанди промышленностдин, энергетикадин, яшайишдин са жерге маса хилера кьилиз акъудзавай проектар къалурна. Абурун арада Хасавюрт ва Дербент шегьеррилай элячIна фидай рекьериз, «Салаватстекло Каспий» компанияди кьилиз акъудзавай энергия хуьдай махсус гуьзгуь арадал гъуниз (энергосберегающее стекло) талукь, «Лазурный берег» ва са жерге маса проектар авай. Идалай гъейри, республикадин министерствойрини ведомствойри форумдин майданра уьлкведин маса регионрин карханайрихъ галаз амадагвилин алакъаяр мягькемаруниз талукь икьрарар кутIунна.
«Къе чна вири къуватар мукьвара республикада къвайи къати марфарин нетижада зиянар хьайибуруз куьмек гунал желбнава. Амма и карди чаз Дагъустан вилик тухуз куьмекзавай чIехи метлеб авай проектар вахтуналди акъвазардай ихтияр гузвач. Акси яз, исятда гьукумдин федеральный органрихъ, чIехи компанийрихъ, уьлкведин маса регионрихъ галаз авай алакъаяр мадни мягькемарун важиблу я…», — лагьана Сергей Меликова.
Агьмед Магьмудов
