28-апрелдиз Махачкъалада алай йисуз дагъустанвияр гьаждал рекье тун патал республикада кьиле тухузвай кIвалахдиз, кьабулзавай серенжемриз талукьарнавай пресс-конференция кьиле фена. Адан сергьятра аваз, жавабдар министерствойри, ведомствойри тешкиллувилин кIвалахдикай гегьеншдиз суьгьбетна.
Гьар йисуз Россиядай гьаждал 25 агъзурдалай виниз агьалияр физва. ЦIи Дагъустандай Исламдин асул дестекрикай сад тир гьаж кьилиз акъудун патал Мекка шегьердиз 10 агъзурни 700 кас рекье гьатда.
Пресс-конференциядал журналистрин суалриз РД-дин милли сиясатдин ва динрин крарин рекьяй министерстводин векил Мурад Ражабова, «Марва-тур» офисдин регьбер Мегьамед Мегьамедова, УФССП-дин, РД-дин здравоохраненидин министерстводин, «Махачкъала» аэропортунин векилри жавабар гана. Абуру гьаждал физвайбуру медицинадин рекьяй кьиле тухвана кIанзавай серенжемрин, самолетра аваз тухуз жедай затIарин (вуч ва гьи кьадарда), уьлкведин часпаррилай регьятдиз элячIун патал суддин приставрин къуллугърин базада авай ксари чпел алай буржар вахкунин ва маса месэлайрин гьакъиндай баянар гана.
«Марва-тур» компаниядин векилди къейд авурвал, Меккадиз фин патал гьаждин махсус виза къачун чарасуз шартI я, туристрин визаяр гваз аниз фин къадагъа я.
Чи мухбир
