Яшайишдин кIвал маса къачун ва я эцигун – им Дагъустанда дидевилин капиталдикай менфят къачузвай виридалайни машгьур рехъ я. ИкI, 2025-йисуз Дагъустанда, дидевилин (хизандин) капиталдикай ва гьакI кредитдин такьатрикайни менфят къачуналди, 10 агъзурдалай виниз хизанри чпин яшайишдин шартIар хъсанарна. Россиядин Яшайишдин фондунин (СФР) Дагъустанда авай отделениди и рекьиз 7 миллиарддилай виниз пул чара авунва. Идакай чаз идарадин пресс-къуллугъди хабар гана.
Гьа са вахтунда яшайишдин шартIар хъсанарун патал дидевилин капиталдикай, ам къачунвай аялдин 3 йис тамам хьайила, менфят къачуз жезвайдини фикирдай акъудна кIандач. Амма ипотекадин кьилин бурж вахкун ва я сифтегьан пул (взнос) яз гун иник акатзавач. И дуьшуьшра такьатрикай аял ханмазди ва я аял хвавиле (ва я рушвиле) кьабулнамазди, менфят къачуз жезва. Яшайишдин кIвал маса къачун ва я эцигун патал банкда кредит къачудайла, диде-бубадивай дидевилин капиталдин такьатрин жигьетдайни арза гуз жезва. Нетижада кьве (банкдиз ва Яшайишдин фондунин отделенидиз) арзадин чкадал сад гун бес жезва.
— Эгер яшайишдин шартIар хъсанарун патал кредит къачунватIа, дидевилин капиталдин такьатрикай менфят къачуналди ам вахкун патал «Госкъуллугъар» порталдин куьмекдалди арза гун бес я. Сертификатдин сагьиб идан патахъай Яшайишдин фондунин отделенидиз ва я банкдиз финин лазимвал авач. Кредитдиз талукь малумат чав идарайрин арада авай электронный къайдадин алакъадикай менфят къачуналди агакьда. Ида хизанар патал кIвалах кьезиларзава, — къейдзава СФР-дин Дагъустанда авай отделенидин управляющийдин везифаяр тамамарзавай Алжанат Загьидовади.
РикIел хкин: къенин юкъуз дидевилин капиталдин такьатар 5 хиле харж ийиз жезва: яшайишдин шартIар хъсанаруниз, аялар патал чирвилер къачудай къуллугърай гудай пул яз, дидедин гележегдин пенсия патал, инвалид аялар обществода яшайишдин рекьяй адаптациядин ва интеграциядин къуллугърай гудай пул яз, гьакIни пуд йис тамам тахьанвай аял авай хизанар патал гьар вацра гудай пул яз, эгер хизандин дуллух тIимилди ятIа (яни виридаз и пул гузвач).
Дидевилин капиталдиз талукь яз винидихъ къалурнавай чешмедин малуматда мадни хабар ганвайвал, 2025-йисуз Дагъустанда 120 хизанди дидевилин капиталдин такьатрин гьисабдай аялри чирвилер къачудай къуллугъриз гудай пул яз рекье тунва. Программа кардик квай вири девирда дагъустанвийрин 4 агъзур хизанди дидевилин капиталдин такьатар аялри образование къачунин къуллугърай гудай пул яз рекье тунва. Ихьтин планар авай ксари «Госкъуллугъар» порталда, МФЦ-да ва я Дагъустандин Яшайишдин фондунин муьштерийрихъ галаз кIвалахдай къуллугъриз атана, арза гун герек я. Дидевилин капиталдин такьатрин гьисабдай яз пул дагъустанвийрин хизанривай образованидин вири идарайриз рекье тваз жезва: аялрин бахчадилай гатIунна, вузда кIелунал къведалди, гьатта машин гьализ ва къецепатан чIалар чирдай курсар, яратмишунрин рекьяй тарсар, спортдал машгъул хьун, репетиторрин къуллугъар патални.
Гьа са вахтунда образованидин къуллугърай гузвай пул яз и такьатар анжах аялдин 3 йис тамам хьайидалай кьулухъ рекье тваз жеда.
Эгер и ва маса месэладиз талукь яз суалар аматIа, жавабар, Россиядин Яшайишдин фондунин сад тир алакъадин центрадиз зенгна (телефон: 8 (800) 100-00-01), жагъуриз жеда. Зенг пулсузди я.
Рагнеда Рамалданова
