Рахунар акьалтIардалди
Саласадин няниз США-дин президент Дональд Трампа Ирандихъ галаз ягъунар акъвазарунин муддат артухар хъийизвайдакай малумарна. Идакай «РИА Новости» чешмеди хабар гузва.
Трамп Тегеранди теклифар малумардалди ва рахунар акьалтIардалди женгинин гьерекатар давамар тахвунин фикирдал атанва. Къалмакъал къайдада тунин патахъай теклифар гуьзетдай вахтунда Америкадин кьушунар Ближний Востокда женгинин тамам гьазурлухвиле аваз амукьда.
Гьа са вахтунда Ирандин «Tasnim» агентстводи хабар гузвайвал, Исламабадда кьиле фин мумкин тир рахунра Иранди иштиракдач. Ихьтин къарар, Тегерандин гьукумдарри малумарзавайвал, США-ди мажбурнамаяр кьилиз акъуд тавун себеб яз кьабулна. Кьилди къачуртIа, Иранди Америкадин терефдик Пакистандин шериквал аваз ягъунар акъвазарунин план чIурайвиляй тахсир кутазва.
Къейд ийин, кьве гьафтеда ислягьвал хуьнин патахъай Иранни США 8-апрелдиз меслят хьанай.
Махсус серенжемдикай
РФ-дин Яракьлу Къуватри Харьковдин областдин Ветеринарное хуьр гуьзчивилик кутуна, ДНР-дин Гришино тамамдиз азадна. Идакай РФ-дин оборонадин министерстводи 21-апрелдин няниз хабар гана.
Украинадин кьушунрикай суткадин муддатда СВО кьиле физвай мулкара 1050 аскер хкатна. РФ-дин «Кефер пад» кьушундин жавабдарвилик квай мулкара мидяйрикай 190 кас кьван терг хьана, «РагъакIидай пад» кьушундин гьерекатар себеб яз – 195 кас, «Кьибле пад» кьушундин гьерекатар себеб яз – 195, «Центр» кьушундин гьерекатар себеб яз – 340-далай виниз, «РагъэкъечIдай пад» кьушундин гьерекатар себеб яз – 75-дав агакьна, «Днепр» кьушундин гьерекатар себеб яз – 55-далай гзаф.
22-апрелдиз хабар гайивал, РФ-дин ПВО-дин такьатралди мидядин 155 беспилотник яна. ВСУ-ди абур Курскдин, Самарадин, Белгороддин, Брянскдин, Воронеждин, Саратовдин, Пензадин, Ульяновскдин, Волгограддин, Ростовдин областрихъ, Кубандихъ, Крымдихъ ва ЧIулав гьуьлуьхъ ахъайнавай.
Эхиримжи делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 671 самолет ва 284 вертолет, зенитный ракетайрин 656 комплекс, пилот галачиз лув гудай 136352 аппарат, 28992 танк ва дяведин маса машинар, РСЗО-дин 1704 машин, артиллериядин ва маса 34555 яракь, военный махсус 59876 автомашин тергна.
Гьарда вичин иесивал
США-дин гьукумдарри амадагриз чпи чеб хуьнин теклиф ганва. Эгер са гьихьтин ятIани къурхулувал арадал гъидай агьвалатар хьайитIа, амадагри, а къурхулувилер алуддайвал чпин хивез жавабдарвал къачуда. Вашингтонди и кар патал алахъунар ийида. «ТАСС» чешмедин делилралди, ихьтин фикир Пентагондин 2027-йисан бюджетдин проектдихъ гилигнавай алава малуматра къейднава.
Къейдзавайвал, США-ди уьлкве хуьнин, Китайдин хура акъвазунин месэла кар алайди яз гьисабда. Амадагри лагьайтIа, чпин хсуси мулкара арадал атун мумкин тир къурхулувилер алудунин патахъай Америкадин патай куьмекдин жигьетдай сергьятвилер авай шартIара серенжемар кьабулна кIан жеда. «Америкади абурун оборонадиз такьатар ахъаюнал эхир эцигзава», – кхьенва документда.
Европадин уьлквейра НАТО-дик акатзавай амадагар, кьилди къачуртIа США, мумкин тир дяведин гьерекатра иштиракуниз гьазур тирвилин гьакъиндай шаклувилер ийидайбур артух хьанвайдакай идалай вилик са жерге СМИ-ри раижнай.
Ливандал гьужумна
Израилдин беспилотникди Ливандин ислягь агьали кьена, гьужумдин нетижада мад кьве касдал хирер хьана. Идакай Ливандин милли «NNA» агентстводи хабар гузва.
Ливандинни Израилдин арада ягъунар акъвазарунин патахъай 16-апрелдилай икьрар къуватда гьатнава. ГьакI ятIани, «Хезболла» тешкилатди малумарзавайвал, Израилди ислягьвилин икьрар 200-далай гзаф сеферра чIурнава.
Гьазурайди — К. Ферзалиев
