2026-йисан 15-апрелдиз 72 йисан яшда аваз чи арадай бажарагълу композитор, вичин вири уьмуьр акьалтзавай несилдиз тербия гуниз бахшай муаллим, Дагъустандин харусенятдин лайихлу векил Насир Бабаевич Шагьмурадов акъатна.

Н.Б. Шагьмурадов 1953-йисан 16-августдиз Докъузпара райондин Миграгъ-Къазмайрин хуьре дидедиз хьана. Гележегдин композитордин аял ва жегьил вахтар Баку шегьерда акъатна. 1969-йисуз юкьван мектеб акьалтIарайдалай кьулухъ­ ам Махачкъаладин культпросветучилищедин дирижервилин­ни хордин отделенидиз гьахьна. Училище акьалтIарай 1972-йисалай Шагьмурадова­  Москвадин харусенятдин гос­ин­сти­тут­дин (МГИК) оркестр­дин хиляй чирвилер къачун давамарна.

1976-йисуз Н.Б. Шагьмура­дов Дербентдин музыкадин учи­лищедин халкьдин алатрин хилез кIвалахал ракъурна. Са тIимил вахт арадай фейила, адаз Советрин Армия­дин жергейриз эвер гана. Ватандин­ вилик буржи тамамарна хтайдалай гуьгъуьниз ада вичин уьмуьр­дин эхиримжи йикъалди винидихъ тIвар кьунвай училищеда кIва­лахна.

1977-йисуз Н.Б. Шагьму­ра­дова училищеда халкьдин макьаматдин алатрин студент­рин оркестр арадал гъана ва саки 50 йисуз адаз регьбервал гана.

Композитор хьиз, Н.Б. Шагьмурадов 500-далай виниз эсер­рин автор я. Абурун арадай чавай «Нарын-Къала» (Ф. Уру­жев),­ «Шадвал», «Беневша» (А. Сайдумов), «Ава жал» (Ш. Къаф­ла­нов), «Эллина», «Ирид булахар» (Г. Шугаев), лезгийрин, табасаранрин ва азербайжанрин театррин 51 тамашадиз теснифнавай гьавайрин тIварар кьаз ­жеда.

Дагъустандин макьаматдин харусенят вилик тухуник кьетIен пай кутунай Н.Б. Шагьмурадоваз 1999-йисуз «Дагъустандин харусенятдин лайихлу векил» лагьай виниз тир тIвар гана. 2003-йисуз композитордин Дербентдин шаиррин чIалариз теснифнавай манийрикай ибарат «Дербентдикай манияр» кIва­тIал чапдай акъатна.

Насир Бабаевич Шагьму­радов рагьметдиз финихъ галаз алакъалу яз, чна адан хизандиз, вири багърийриз, дериндай хажалат чIугунивди, башсагълугъвал гузва. Адан экуь къамат чи рикIера амукьда.

Ашурагъаеврин хизан, Хив райондин Фиригърин хуьр.