10-апрелдиз «Лезги газетдин» редакцияда гьар йисан рамазандин вацра газет кIелзавайбурун арада Ислам диндиз талукьарна кьиле тухузвай конкурсдин гъалибчийрив шабагьар вахкана.
Къейд ийин хьи, мярекат «Лезги газетдин» редакциядин куьмекдалди Алкьвадар Гьасанан тIварцIихъ галай медениятдинни марифатдин центради тешкилзава. ЦIи ам ирид лагьай сеферда кьиле фена.
Мярекатда Алкьвадар Гьасанан тIварцIихъ галай центрадин регьбер, «Лезги газетдин» кьилин редактор Мегьамед Ибрагьимова, диндин алим, конкурсдин кIвалахриз къимет гайи Ямин Мегьамедова иштиракна. ЦIи конкурс РД-дин информациядин ва печатдин Агентстводин регьбердин меслятчи Мурад Мегьамедкеримован куьмекдалди тешкилнавай. Пишкешрин фондуни 60 агъзур манат тешкилна.
Нетижада 1-чка – Ахцегь райондин Луткунрин хуьряй тир Абдулла Мегьамедова, 2-чка – Кьурагь райондин Гелхенрин хуьряй тир Зугьраб Абдурагьманова, 3-чка Махачкъалада яшамиш жезвай алидхуьруьнви Демир Шагьбанова кьуна.
Кьилин савкьат телефонни 15 агъзур манат пулдин пишкеш А.Мегьамедовав вахкана. З.Абдурагьманов багьа савкьатдизни 12 агъзур манат пулдин пишкешдиз лайихлу хьана. Д.Шагьбанован агалкьун капI ийидай халичадалди, 9 агъзур манат пулдин пишкешдалди къейдна. Абуруз пудазни гьакIни дипломар, «Зам-Зам» ятар гана.
Мярекатдин эхирдай Мегьамед Ибрагьимова конкурс тешкилунин карда куьмекар гунай Ямин Мегьамедовазни Мурад Мегьамедкеримоваз сагърай лагьана.
Агьмед Магьмудов
