И йикъара СтIал Сулейманан райондин Сардархуьруьн спорткомплексда школайра кIелзавай аялрин арада дзюдодай Дагъустандин кIвенкIвечивал патал акъажунар кьиле фена. Ана республикадин жуьреба-жуьре районрайни шегьеррай тир 100-далай виниз жаванри заланвилин 9 категориядай чпин устадвал къалурна. Райондин дзюдоистри 8, гьа гьисабдай яз, къизилдин – 3, гимишдин – 2 ва буьруьнждин 3 медаль къазанмишна.
Акъажунар ачухуниз талукьарнавай шад мярекатдал райондин кьил Саид Темирханован тIварунихъай жаван спортсменар спортдин, туризмдин ва жегьилрин крарин рекьяй комитетдин директор Чингиз Абдулмежидова тебрикна. Чими келимаяр абурун тIварунихъ райондиз акъажунриз хтанвай гьуьрметлу мугьман, Дагъустандин дзюдодай федерациядин вице-президент Юрий Исмаиловани лагьана. Ада республикадин спортсменрин арада дуствал мягькемарунал, спортдин и жуьредай устадвал хкажунал гьалтайла турнирдин важиблувал къейдна, жаванрихъ мягькем сагъвал, гьам спортда, гьамни кIелунра агалкьунар хьун алхишна.
***
Алатай гьафтеда Махачкъалада, Г. Агьмедован тIварунихъ галай Олимпиададин резервдин спортшколада, грекринни римлуйрин жуьреда кьуршахар кьунай Дагъустандин чемпионат кьиле фена. Ана 100-дав агакьна спортсменри гьасиррал чпин устадвал къалурна.
Хъсан нетижаяр къазанмишайбурун арада Хасавюрт райондин ЦIийи Къурушдилай тир спортсменарни ава. ИкI, тренер Эльяр Къулиеван гъилик устадвал хкажзавай Рашид Гьажибабаев (67 кг) – къизилдин, Расим Азимкъулиев (67 кг) ва Ренат Агьмедов (77 кг) буьруьнждин медалриз лайихлу хьана.
Чемпионатда гъалиб хьайибурукай тренерри 20-22-апрелдиз Чечнядин Грозныйда кьиле фидай СКФО-дин чемпионатда иштиракдай республикадин хкянавай команда арадал гъида.
***
И мукьвара Каспийскда, А. Алиеван тIварунихъ галай спортдин дараматда, грэпплингдай Дагъустандин чемпионат кьиле фена. Ана чи кьве ватанэгьлиди гъалибвилер къазанмишна. ИкI, сифтегьан юкъуз кимоно алачиз кьиле фейи бягьсера 92 кг-дин заланвал авайбурун арада Арсен Сулейманов – 1 ва 100 кг-дилай артух заланвал авайбурун арада Имам Жамирзеев 2-чкайриз лайихлу хьана. Гуьгъуьнин юкъуз И. Жамирзеева вичин заланвиляй кимоно алаз кьиле фейи бягьсера 1-чка кьуна.
Махачкъаладин «Old_school_figters» клубда устадвал хкажзавай жегьилар кесерлу жуьреба-жуьре турниррин гъалибчияр я. Гила абуру кьведани СКФО-дин кIвенкIвечивал патал акъажунриз гьазурвал аквада.
РикIел хкин: алатай йисан эхирра Санкт-Петербургда Бразилиядин джиу-джитсудай международный бягьсерай тешкилатди кьиле тухвай ачух чемпионатда дуьньядин жуьреба-жуьре уьлквейрай тир 6 агъзур спортсменди иштирак авуналди рекорд эцигнай. Дагъустандин медицинадин госуниверситетдин студент тир Имам Жамирзеевани ана иштиракнай ва виридалайни гзаф заланвал (абсолютка) авайбурун арада ам 1-чкадиз лайихлу хьанай.
Рагнеда Рамалданова
