И мукьвара Махачкъалада республикадин декоративно-прикладной яратмишунрин «Гатфарин фантазия» конкурс-выставка кьиле фена. Ам тешкилнавайди Дагъустандин культурадин министерстводин республикадин кIелунинни методикадин центр тир. «КIарасдал нехиш атIун», «Къванцел нехиш атIун» ва «Парталрин дизайн» номинацийрай республикадин аялрин художественный ва искусстводин школайрин арада аялрин кьиле фейи конкурсда-выставкада санлай 800-далай виниз кIвалахар къалурнавай.
Кьурагь райондин администрациядин пресс-къуллугъди хабар гузвайвал, конкурсда-выставкада кIвенкIвечи чкаяр кьурбурун арада Кьурагьрин аялрин искусстводин школада (ДШИ) чирвилер къачузвайбурни ава. ИкI, «КIарасдал нехиш атIун» номинацияда Гьабиб Алиметов – 1 ва Керим Алиев 2-чкайриз лайихлу хьана. ГьакIни яратмишунрив эгечIнавай тегьердиз ва аялри уьмуьрдиз кечирмишнавай фикирдин кьетIенвилиз килигна, ДШИ-диз — 3-дережадин диплом, ученикар пешекарвилелди гьазурунай ва художественный образование вилик тухунай школадин муаллимриз – Къурбансмяли Хариеваз ва Мукаил Рамазановаз Дагъустандин культурадин министерстводин республикадин кIелунинни методикадин центрадин гьуьрметдин грамотаяр гана.
Регина Семедова
