Дагъустанда образованидинни илимдин министерстводин буйругъдалди мектебра кIелзавайбурун арада гьар йисуз милли хилериз талукь олимпиадаяр кьиле тухузва. Абур са шумуд паюникай ибарат я: мектебдин, муниципальный, республикадин.
Хайи чIаларай (гьа жергедай яз лезги чIалайни) олимпиадайрин республикадин пай 2026-йисан 28-мартдиз кьиле фена, хайи эдебиятрай – 4-апрелдиз. Республикадин паюна, адет яз, анжах 9, 10 ва 11 лагьай классра кIелзавайбуру иштиракзава.
Олимпиадаяр А.Тахо-Годидин тIварцIихъ галай ДНИИП-дин къуллугъчийрин гуьзчивилик кваз Махачкъалада авай ДИРО-да кьиле фена. Лезги чIалан олимпиадада жуьреба-жуьре шегьеррайни хуьрерай атанвай 18 ученикди иштиракна. Абурун чирвилериз винидихъ тIвар кьунвай ДНИИП-дин къуллугъчийри къимет гана: Жаклина Мейлановади, Куругъли Ферзалиева ва Карина Магьманэмировади.
Лезги чIалай олимпиададин нетижаяр ихьтинбур хьана:
9-классда кIелзавайбурун арада Дербент шегьердин 3-нумрадин мектебдин ученица Гуьлара Мегьтиева гъалиб хьана, СтIал Сулейманан райондин Агъа СтIал-Къазмайрин мектебдин ученица Камила Фатагьовади приздин чка кьуна.
10-классда кIелзавайбурун арада Мегьарамдхуьруьн райондин Гъепцегьрин мектебдин ученица Гуьлкелем Афизова гъалиб хьана, Кьурагь райондин КIирийрин мектебдин ученик Эльмар Къагьирова приздин чка кьуна.
11-классда кIелзавайбурун арада Мегьарамдхуьруьн райондин Уружбайрин мектебдин ученица Марина Керимова гъалиб хьана, СтIал Сулейманан райондин Курхуьруьн 1-нумрадин мектебдин ученица Камила Сийибуллаевади приздин чка кьуна.
Лезги эдебиятдай олимпиадада 13 ученикди иштиракна. Нетижаяр ихьтинбур хьана:
9-классда кIелзавайбурун арада Мегьарамдхуьруьн райондин Чепелрин мектебдин ученица Карина Керимханова гъалиб хьана, Докъузпара райондин ЦIийи Къаракуьредин мектебдин ученица Саида Мугъуловади приздин чка кьуна.
10-классда кIелзавайбурун арада СтIал Сулейманан райондин Эминхуьруьн мектебдин ученица Нурият Нурметова гъалиб хьана, Ахцегьрин 1-нумрадин мектебдин ученица Серми Бегеевади приздин чка кьуна.
11-классда кIелзавайбурун арада Ахцегь райондин Луткунрин мектебдин ученик Решад Ашурбегов гъалиб хьана, СтIал Сулейманан райондин НуьцIуьгърин мектебдин ученица Рамиля Гьуьсейновади приздин чка кьуна.
Л. Фетгьуьллагь
