И йикъара Каспийскда, Къ. Къурамегьамедован тIварунихъ галай физкультурадинни сагъламвилин комплексда, джиу-джитсудай кьиле фейи республикадин акъажунра, Дагъустандин са кьадар шегьеррайни районрай хьиз, Кеферпатан Осетия-Аланиядай тир спортсменрини чпин устадвал къалурна.
КIвенкIвечи чкаяр кьур спортсменрин арада Ахцегь райондин многофункциональный спортшколада ва «Ekberov Team» клубда тренер Эйнар Экберован гъилик вердишвилер къачузвай жаванарни ава. ИкI, Жамал Букаров (48 кг), Исламудин Алиев (69 кг), Ислам Айдунбегов (36 кг), Мамед Садикьов (62 кг) ва Амир Хасплатов (40 кг) – 1, Абдулхаликь Садикьов (69 кг) ва Ибрагьим Алиев (77 кг-дилай виниз) — 2, Гьажи Лачинов (62 кг), Мурад Хударов (32 кг), Ислам Мирзалиев (56 кг). Мегьамедрасул Хасплатов (44 кг), Абубакар Байрамов (23 кг) ва Замир Амрагьов (21 кг) 3-чкайриз лайихлу хьана. Санлай къачурла, къазанмишнавай нетижайриз килигна, Ахцегь райондин командади 2-чка кьуна. Каспийск шегьердин команда – 1 ва Кеферпатан Осетия-Аланиядин командани 3-чкайриз лайихлу хьана.
Къейд ийиз кIанзава хьи, гъалибчийрив шабагьар вахкуниз талукьарнавай шад мярекатдал чи ватанэгьли, джиу-джитсудай Россиядин хкянавай командадин кьилин тренер, Дагъустандин спортдин и жуьредай федерациядин президент, Россиядин женгинин искусствойрин мастер, Япониядин императордин гъиляй 9-Дандин яру чIул къачунвай Нурдин Эминова машгьур тренер Эйнар Экберовав женгинин джиу-джитсудин международный федерацияди джиу-джитсудай ва гошин джитсудай (самооборонадиз талукь техникайрин жуьре) 1-Дан, гьакIни спорт вилик тухуник лайихлу пай кутунай мастер-насигьатчивилин гьуьрметдин тIвар гунин сертификатар вахкана. Э. Экберова вичин кьилин насигьатчидиз, спортда мягькем камар къачуз куьмек гузвай Нурдин Амрагьовичаз сагърай лагьана.
Регина Семедова
