Ахцегь районда «Ахцах» тIвар алай ракъинин сад лагьай электростанция эцигунин кIвалахрив гатIуннава. Идакай РД-дин энергетикадин ва тарифрин министерстводин телеграм-каналди хабар гузва.
«Ахцах» СЭС (солнечная электростанция) Ахцегьрин кьиблепатан гуьнедал 1000 метрдилай гзаф кьакьан чкадал эцигда. Дагъдин мулкар энергиядалди дурумлудаказ таъминардай и проект РД-дин энергетикадин ва тарифрин министерстводин куьмекдалди кьилиз акъудда. Адан инвестор «Самурская генерирующая компания» я («СамурЭнерджи» компания, ам «ЭкоЭнерджи» группадик акатзава).
Сад лагьай этапда станциядин гужлувал 1 МВт-дикай ибарат жеда, гележегда ам 2,5 МВТ-дал кьван хкажда. СЭС энергия кIватIдай къурулушдалди тадаракламишда, и карди энергия гьасилунин нетижалувал артухарда.
Чешмедин малуматралди, «СамурЭнерджи» компанияди дагълух районра «энергия кIватIдайбур» галай кьилдин-кьилдин СЭС-рин сеть (сеть распределённых СЭС с накопителями) арадал гъун пландик кутунва.
Гьазурайди – Муса Агьмедов
