Трамп НАТО-дилай нарази я

США-дин президент Дональд Трампа вичин уьлкведиз НАТО герекзавач лагьана. Идакай «РИА Новости» чешмеди хабар гузва.

«Квез гьакъикъат чир хьана кIанзаватIа, вири Гренландиядилай башламиш хьана. Чаз Гренландия герекзава. Абуруз ам чав вахкуз кIанзавач», – лагьана Д.Трампа Лацу кIвале кьиле фейи пресс-конференциядал.

НАТО-дихъ галаз гьафигьалал хьайидалай кьулухъ Трампа журналистрихъ галаз ийизвай ихтилат кьатIна ва ам мярекат кьиле физвай чкадай хъфена.

Ада Ирандиз акси яз тухузвай дяведин серенжемда чпиз куьмек гуник кьил кутун тавурвиляйни НАТО-дилай наразивалзава. Сиясатчиди куьмек гуник кьил кутун тавунин къарар альянсдин дережа патал ахлат тийидай леке яз гьисабзава.

«Абур чаз герек хьайиди туш, им ашкара кар я, вучиз лагьайтIа абуру гьич са жуьредани куьмек ганач», – лагьана    Д. Трампа. Ада алава хъувурвал, НАТО «чарарал алай» пеленг я ва Россиядиз адахъай кичIезвач.

Военный альянсдикай хкечIунин месэладиз рикIивай килигзавайдакай Трампа алатай гьафтеда малумарнай. Госсекретарь Марко Рубиоди къейд авурвал, Ближний Востокда къалмакъал куьтягь хьайидалай кьулухъ Вашингтонди уьлкве патал НАТО-дихъ авай метлебдиз мад сеферда фикир хгун герек ­жеда.

Канададал гьужумдач

Дональд Трампа къейднавайвал, адаз Канада США-дин 51 лагьай штат яз кьабулдай къаст авач. Идакай «РИА Новости» чешмеди хабар гана. «За фикирзавайвал, Канададин агьалийрин далудихъ 200 йисан тарих гала… Канада США-дик кутунин месэла кьиле фидач», – лагьана ада.

Трампа Канададин королдин гьукумдиз темягь тавун хиве кьуна. Къейд ийин, идалай вилик Америкадин регьберди ­Канада США-дин 51 лагьай штат хьун герек тирдакай са шумудра лагьанай. Канададин премьер-министр М. Карниди вичин уьл­кве гьич садрани США-дин штатдиз элкъведач лагьанай.

Бейкарар патал бигер

Одесса шегьердин гьукумдин кьиле авайбуру кIвалахдайбур бес тежезвайвиляй 18-65 йисан яшара авай бейкар агьалияр патал бигер кардик кутазва. Идакай, Украинадин СМИ-рал асаслу яз, «РИА Новости» чешмеди хабар гана.

Къейдзавайвал, кIвалахдик квачир агьалияр далдаламиш жедай чкаяр туькIуьрунин, гуманитарный пар ялунин, чир тахьун патал бедендал алукIдай махсус парталар гьазурунин кIва­­лахрал желб ийиз кIанзава.

Герек хьайитIа, гьакъисуздаказ ийидай мажбури кIвалахрал бейкар тушир ватандашарни желбда лугьузва.

Крокодилринни гъуьлягърин куьмекдалди

Индиядин гьукумдарар уьлкведин сергьятрал къаравулвал авун патал гъуьлягъарни крокодилар желбунин месэладиз килигзава. Идакай «The Hindu» чешмеди хабар гузва.

Къейдзавайвал, Бангладешдихъ галаз авай вацIун сергья­тар алава яз хуьн патал зегьерлу гъуьлягъар ва крокодилар ишлемишунин фикир уьлкведин МВД-динди я. Ихтилат физвай участок селлер къвезвай четинди хьуниз килигна, ана адетдин жугъунар, паруяр туькIуьрдай мумкинвал жезвач.

Молдавиядай агакьарзава

ВСУ-див НАТО-дин патай Молдавиядай агакьарзавай дяведин суьрсетар артух хьанва. Ихьтин фикир «РИА Новости» чешмедиз дяведин пешекар А. Марочкоди малумарна.

«Эхиримжи вахтара ВСУ-ди Днестр вацIалай военный парар агакьарунин серенжемар хейлин артухарнава. Кьилди къа­чуртIа, йифен вахтунда НАТО-дин куьмек агакьарзава», – лагьана ада.

«Лезги газет»