Дагъларин уьлкведин меркезда дяведин махсус серенжемдин иштиракчийрин «Чи аямдин игитар» тIвар алай 3-конференция кьиле фена. Ана республикадин Кьил Сергей Меликовани иштиракна.
Мярекатда военный къуллугъчияр, абурун хизанар, гьукумдин органрин ва жемиятдин векилар авай. Ихьтин гуьруьш дяведин махсус серенжемдин иштиракчийрик ва абурун хизанрик секинсузвал кутазвай вири месэлайриз, суалриз жавабар жагъурун патал тешкилнавай.
— Са рахунни алач, СВО-дин иштиракчийрин гьакъиндай къайгъударвал чIугун государстводин эвелимжи везифа я, – лагьана С. Мелкова. – Иллаки абуруз яшайишдин рекьяй лазим куьмек гун. Авайвал лагьайтIа, и рекьяй чна гзаф кIвалахар ийизва. Республикада СВО-дин иштиракчийриз ва абурун хизанриз яшайишдин рекьяй виле акьадай галайвилер ийидай 27 серенжем уьмуьрдиз кечирмишзава. Абурун кьадар чна мадни артухарда. Герек, аскерриз ва абурун хизанриз чна ийизвай вири галайвилерикай хабар гун, чирин, абур кIеве амукьдайвал тан тийин, – къейдна региондин регьберди.
С. Меликова акьалтзавай несил ватанпересвилин руьгьдаллаз тербияламишуниз кьилин фикир гана кIанзавайдакайни лагьана.
Мярекатдин иштиракчийри ахпа кьилдин секцийра (яшайишдин рекьяй хуьн, образование, медицина…) кIвалахна.
***
СтIал Сулейманан райондин администрацияди, меценатри, спонсорри дяведин махсус серенжемдин иштиракчийриз ва абурун хизанриз герек вири жуьредин куьмекар гузва. Администрациядиз ЦIийи Макьарин хуьряй тир СВО-дин иштиракчи Равидин Хийирбегован дидеди хва яшамиш жезвай кIвал ремонтдай гьалда авайдакай хабар гана. Администрациядин къуллугъчийри яргъал вегьенач, гъиле-гъил аваз арза ахтармишна. Малум хьайивал, СВО-дин иштиракчи кьилди яшамиш жезвай, кIвалин шартIарни кутугайбур тушир.
Райондин муниципалитетдин кьил Саид Темирханова пешекарриз герек тапшуругъ гана ва абур кIвалахдив эгечIна. И сувабдин кардик меценатдини вичин пай кутуна. УстIарри кIвал ва чимивал гудай къурулуш ремонтна, герек мебель ва яшайишдин техника маса къачуна. Ремонтдин кIвалахар тамамарайдалай гуьгъуьниз муниципалитетдин кьил чкадал фена ва ам СВО-дин ветеран яшамиш жезвай гьалдихъ галаз таниш хьана. Акур крарилай ам рази яз амукьна.
Равидин Хийирбеговак секинсузвал кутазвай месэлаярни Саид Темирханова вичин гуьзчивилик кутуна. Адав государстводин патай гузвай пулар тамамвилелди агакьнавачир. Медицинадин рекьяйни тайин куьмек авуна кIанзавай. Райондин администрациядин кьили СВО-дин ветерандин дердийрикай «Ватан хуьзвайбур» госфондунин координатордиз хабар гана ва адал месэла гьялун тапшурмишна.
***
Муслим Муслимов эбеди рикIера хуьдайвал, СтIал Сулейманан районда адан бубайрин хуьр тир Сайтархуьре школа Россиядин Игитдин тIварунихъ яна.
Са йис вилик вичиз Россиядин Игитвилин тIвар гайидалай гуьгъуьниз Муслима, райондиз хтана, бубайрин бинейрал кьил чIугунай. Ам школадиз фена, вичин бубади кIелай классда ацукьна, агьалийрихъ галаз гуьруьшмиш хьана, рикIел аламукьдай суьгьбетарни авуна. Хуьруьнвийри чпин Игитдал дамахзава. Адаз савкьатар ганай. Муслиман рикIе бубайрин хуьруьз хтунин фикир авай. Вучда кьван, кьисмет масакIа элкъвена. Муслим Муслимов хьтин игитар чи рикIера гьамиша амукьда. Абур акьалтзавай несилриз Ватан кIан хьунин барадай хъсан чешне я.
Хийир Эмиров
