И мукьвара Дербентда боксдай Дагъустандин кIвенкIвечивал патал 2012- 2013-йисара дидедиз хьайи жаванрин арада акъажунар кьиле фена. Ана республикадин жуьреба-жуьре районрай тир 180-далай виниз боксёрри заланвилин 18 категорияда чпин устадвал къалурна, гъутарин къуватар ахтармишна.
ИкI, акъажунра СтIал Сулейманан райондин администрациядин спортдин, туризмдин ва жегьилрин крарин рекьяй комитетди рекье тунвай Камил Наврузбегова – 1 ва Фаргьад Сефибегова 2-чкаяр кьуна. 42 кг-дал къведалди заланвал авайбурун арада чпин алакьунар къалурнавай жегьилриз талукь дережайрин чIулар, медалар ва грамотаяр гана. Кьилинди, гила абуру республикадин хкянавай командадик кваз СКФО-дин кIвенкIвечивал патал алай вацра кьиле фидай акъажунра чпин устадвал къалурда.
Къейд авун лазим я хьи, КIварчагъа кардик квай Гь. Аллагьвердиеван тIварунихъ галай бокс вилик тухудай центрада тренер Альберт Межидован гъилик вердишвилер къачузвай жаванрин агалкьунри чун мукьвал-мукьвал шадарзава. Гаф кватай чкадал лугьун лазим я хьи, адан гъилик вердишвилер къачузвай Имам Сейфулаева и мукьвара Россиядин кIвенкIвечивал патал боксдай Калининградда кьиле фидай акъажунра иштиракда. Ихьтин мумкинвал адаз Краснодарда «Динамо» обществоди, боксдай СССР-дин лайихлу тренер А.А. Лаврован экуь къаматдиз бахшна, 17-18 йисара авай жаванрин арада кьиле тухвай Вирироссиядин акъажунра гъалибвал къазанмишуни гана. Къуй абурун гъалибвилери чун инлай кьулухъни шадаррай!
***
Мартдин эхирра Нижний Новгороддин областдин Бор шегьерда грекринни римлуйрин жуьреда кьуршахар кьунай Вирироссиядин акъажунар кьиле фена. Абур шегьерда спортдин и жуьре вилик тухвай А.И. Серебрякован экуь къаматдиз бахшнавайбур тир. Турнирда иштиракайбурун ва кIвенкIвечи чкаяр кьурбурун арада чи машгьур спортсменар, эхиримжи йисара Москвадин патай экъечIзавай стхаяр Январ ва Анвар Аллагьяроварни ава.
Кьилди къачуртIа, 60 кг-дин заланвал авайбурун арада Анвара – 1 ва Январа 3-чка кьуна. Ахцегьа дидедиз хьана, ана А. Гъаниеван тIварунихъ галай ДЮСШ-да, гуьгъуьнлай Махачкъалада грекринни римлуйрин жуьреда кьуршахар кьунал машгъул хьайи ва чпик еке умудар кутунвай стхайрин агалкьунрикай (гьа гьисабдай яз А. Аллагьярова жегьилрин арада дуьньядин чемпионвилин тIвар, 23 йисал къведалди яш хьанвай спортсменрин арада Европадин кIвенкIвечивал патал акъажунра къизилдин медаль къазанмишуникай) чна са шумудра муштулухар ганай. Нубатдин агалкьунар тебрик авунихъ галаз сад хьиз, чаз чи кьегьалрихъ сагъвал, руьгьдин мадни еке къуватар, вилик квай акъажунрайни абур гъалиб хьана хтана кIанзава.
Рагнеда Рамалданова
