Дармандин набататар
Шикилдай аквазвай хъач чи ерийра булдиз экъечIзавай, инсанри рикI алаз незвай тегьмезхан я. Адакай иллаки афарар гзаф ийида. Адет яз, ам гьаятдин къуза патара, инсанрин кIвач са артух хукIун тийизвай чкайра, рекьерин къерехра экъечIда.
Пешекарри тестикьарнавай делилрал асаслу яз, и хъчадикай дармандин ериндани менфят къачуз жезва. Кьилди къачуртIа, адан куьмекдалди иви акъвазариз жезва. Дармандин макьсад аваз ишлемишун патал и хъчар цуькведамаз кIватIун теклифзава – июндизни июлдиз. КIватIай хъчар, яцIу тушир къатуна туна, хъсандиз гар къекъвезвай чкада ва я хъендик кьурурзава. Галай-галайвал малуматар ва ишлемишунин къайдаяр анжах духтурривай чирун герек я. Маса хъчар, векьер хьиз, тегьмезханни духтуррин меслятрал асаслу тушиз дармандин еринда ишлемишна виже къвезвач.
«Лезги газет»
