Астрахандай тир таржумачи Сергей Федорова лезги чIалай урус чIалаз элкъуьрнавай Дагъустандин халкьдин шаир Сажидин Саидгьасанован «Зи шиирар шииратдин кьушун я» тIвар алай шиир Вирироссиядин эдебиятдин Александр Чаковскийдин тIварцIихъ галай «Гипертекст» премия къачуниз лайихлубурун (номинант) сиягьда гьатнава.
И премия медениятдин рекьяй кар алай жуьреба-жуьре проектар кьилиз акъудунихъ элкъуьрнавай Президентдин фондунин куьмекдалди «Литературная газета» изданиди арадал гъанва. Адан кьилин макьсад алай аямдин алакьунар авай шаирар, гьикаятчияр, эдебиятдин критикар, блогерар винел акъудун, абурук руьгь кутун я. Премия «Проза», «Поэзия», «За вклад в литературный процесс» ва маса номинацийрай гузва. Сажидин Саидгьасанован урус чIалаз таржума авунвай шиир «Русский перевод» номинацияда хъсанбурукай сад яз гьисабнава.
«Гипертекст» премиядин сайтда ганвай малуматдай якъин жезвайвал, гъалибчияр майдин вацра тайинарда ва премиядин 4-сезондин гъалибчийрив шабагьар вахкуда. Чна чи машгьур шаир, ватанэгьли Сажидин Саидгьасанов премиядин сагьибрин арада жедайдак умуд кутазва.
Къейд ийин хьи, премиядин 3-созывда «Русский перевод» номинациядай гъалиб хьайибурун арада Дагъустандин халкьдин шаир Бийке Къулунчакова авай. Адан эсер ногъай чIалай урус чIалаз Дагъустандин писателрин союздин председатель Марина Агьмедовади таржума авунай.
Агъадихъ чна Сажидин Саидгьасанован премиядин конкурсдиз вуганвай «Зи шиирар шииратдин кьушун я» шиир чапзава.
Шииратдин кьушун я зи шиирар,
Шагь дагъдилай тIуб хкIурдай цаварик.
Зи шиирра ава вири девирар,
Женгерани, зегьметдани, суварик!
Дегь девирар лезги чилер, гьуьлни кваз,
Душманрикай хвейи игит лезгияр.
Лезги халкьдин дуьнья машгьур кьуьлни кваз,
Хуьн паталди экъичайд я ивияр!
Зи шиирар, гьар са чIавуз ватандин
Сергьят хуьзвай, игит ксар, аскерар;
Беденни кваз я лигим тир гьулдандин,
Шагьни Шалбуз я зи рикIни жигерар.
Йис-сандивай, югъ-къандивай шиирар
ЭкъечIзава халкьдин вилик майдандиз.
Зи шииррин яргъибур я уьмуьрар,
Къуллугъ ийиз халкьдиз, хайи ватандиз!
Зи шиират, гьам – чIалар, гьам манияр,
Лугьузва чи манидарри виринра.
Баркаллубур яз къалуриз лезгияр,
Гьахь ийизва гьар са рикIин деринра.
Сажидиназ ахвар авач йифизни,
Багъиш ийиз цIийи-цIийи шиирар.
Дуьньядилай кIанзавач заз хъфизни,
Рекьин тийир ксар я кьван шаирар!
Чи мухбир
