Дагъустанда 2026-йисан гатфарин тамарин культурайрин сезон башламишнава, хабар гузва РД-дин тамарин майишатдин комитетди. Мартдин вацралай мешебегияр планда къалурнавай там гуьнгуьна хтунин кIвалахрив эгечIнава. Ногъай райондин тамухъанри, хабар гузвайвал, 25 гектардин чиле къелемар цанва. Гьаваяр чими хьунихъ галаз сад хьиз, къелемар цунин кIвалахдин еришарни йигинарда, хиве кьазва пешекарри. Санлай къачурла, 2026-йисуз Дагъустандин мулкунал там гуьнгуьна хтунин кIвалахар 520 гектарда кьилиз акъуддайвал я.
РД-дин тамарин майишатдин комитетдин председатель Вагьаб Абдулгьамидова къейдзавайвал, Дагъустан Республика Россиядин Федерациядин мулкунал алай тамарин кьадар лап тIимил тир регионрикай сад я. Республикадин анжах 7,2 процентдиз барабар майданар тамари кьунва. Гьаниз килигна, тамар гегьеншарунин, атIанвай чкайра цIийи къелемар цунин, яни тамар гуьнгуьна хтунин кIвалахрин важиблувал иллаки екеди я.
Саида Мурадова
