Дербент райондай дяведин махсус серенжемда иштиракзавай са шумуд кас Россиядин Игит лагьай баркаллу тIварцIиз лайихлу хьанва. Чпин вилик эцигзавай везифаяр кьегьалвилелди кьилиз акъудзавай аскерар, офицерар мад ава. Абурукай сад райондин Мичурино хуьряй тир Тимур Гьамидов я.
Ада 2023-йисалай Донбассдин мулкар цIийи фашистрикай азадзавай женгера иштиракзава ва гьар са макъамда уьтквемвал къалурзава. Юлдашри лугьузвайвал, «Тим» лакIаб алай аскер пара жуьрэтлуди, са куьнихъайни кичIе туширди я. Ада лап четин шартIара душмандин гуьллейрин кIаник вичин алакьунрикай менфят къачузва.
Командирдин нубатдин тапшуругъ атана: «Душман вич авай чкадай чукурин. Чи частариз виликди гьужумдай мумкинвал арадал гъин». Месэла четиндаз элкъвена. Миллетбазри вил ахъайиз тежедайвал гуьлле гузвай. «Тим» душмандиз кар кьаз кIвачин хьана. Адан план лап хаталуди тир. Мотоциклдал 30 килограмм хъиткьинардай шейни эцигна, ада вичин улакь Украинадин миллетбазри сенгер кьунвай даяхдал гьална. Нацистрин артиллеристар мотоциклдал алай Россиядин аскер ягъиз алахънатIани, абурулай са затIни алакьнач. «Савкьат-посылка» душмандиз туна, Тимур вич атайвал чи патаз кат хъувуна. Посылка хъиткьинна, душманар терг хьана ва отделенидиз виликди фидай рехъ ачух хьана.
Тимур Гьамидован викIегьвал себеб яз, чи аскерри са шумуд хуьр азадна. Дагъустанви вичин юлдашриз гьар са карда чешне я. Ада командиррин ва женгинин юлдашрин арада гьакъикъи гьуьрмет къазанмишнава. Инсанвилин къилихралди, патав гвайдаз куьмек гуналди, са шумуд сеферда юлдашар кьиникьикай къутармишуналди, женгерин вахтунда жуьрэтлувал къалуруналди ва четин тапшуругъар кьилиз акъудун вичин хивез къачуналди. Тимур хьтин кьегьалар чи уьлкведин даяхни дамах я.
Дяведин гьерекатар фад куьтягь хьана, къуй чи кьегьалар чпин хизанрин патав хкведай югъ мукьвал хьурай!
Абад Азадов
