Малум тирвал, дяведин махсус серенжемдин иштиракчийриз ва абурун хизанриз гьукумдин органри хейлин галайвилер ва кьезилвилер ийизва. Абурук налогриз талукьбурни ква.
РД-дин Халкьдин Собранидин СВО-дин иштиракчийрин ва ветеранрин крарин рекьяй комитетдин председатель Абдулла Мегьамедова гъавурда турвал, федеральный закондин бинедаллаз дяведин махсус серенжемдин ветеранар, военнияр, гуьгьуьллувилелди женгерин майдандал фейибур, къайдаяр хуьдай органрин СВО-дин иштиракчи къуллугъчияр транспортдин налогдикай азадзава.
И кьезилвал винидихъ тIвар кьунвай ксарин багърийризни (уьмуьрдин юлдаш, яш тамам тахьанвай аялар, вузда кIелзавай 23 йис тамам тахьанвай жегьилар) талукь жезва. Эгер хизанда са шумуд автомашин аватIа, налогдикай анжах са машин хкудзава. Транспортдин налогдикай азад авун патал налогрин органдиз арза кхьин лазим я. Арза йисан гьи вахтунда хьайитIани вугуз жеда.
Закон 2025-йисан ноябрдиз къуватда гьатнавайди ятIани, адакай 2022-йисалай мефят къачуз жеда. Яни эгер са касди дяведин махсус серенжемда 2022-йисалай иштиракзватIа, 2025-йисалди адавай кьур налогдин кьадар эвез хъийида. Анжах рикIел хуьн лазим я: 10 миллиондилай виниз къиметдин багьа автомашинар транспортдин налогдикай азадзавач.
Абад Азадов
