Махсус серенжемдикай
«Кефер пад» кьушунрин дестеди Харьковдин областдин Песчаное хуьр гуьзчивилик кутуна. Идакай 24-мартдиз РФ-дин оборонадин министерстводи «МАХ» мессенджерда кардик квай каналда хабар гана.
Россиядин мулкара авай яшайишдин объектрал авур гьужумриз жаваб гун яз, и йифиз Россиядин Яракьлу Къуватри дуьм-дуьз яракьралди Украинадин дяведин ва санайидин комплексриз бегьем ягъунар кьуна. Мидяди анра гьар жуьре ракетаяр ва абуруз герек затIар арадал гъизвай.
РФ-дин оборонадин министерстводи 23-мартдиз малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 671 самолет ва 284 вертолет, зенитдин ракетайрин 652 комплекс, пилот галачиз лув гудай 126663 аппарат, 28430 танк ва дяведин маса машинар, РСЗО-дин 1691 машин, артиллериядин ва маса 34020 яракь, дяведин махсус 57546 автомашин тергна.
Ирандинни США-дин арада
Ирандин военнийри Ближний Востокда авай США-дин базаяр тергна. Гьа са вахтунда Д.Трампа гуя уьлквейрин арада рахунар кьиле физвайдакай малумарнавай.
Ирандин «IRNA» агентстводи чапнавай малуматда къейднавайвал, «Гьахълу хиве кьун – 4» серенжемдин 77 лагьай кам агалкьунралди кьилиз акъуднава, кьилди къачуртIа, душмандин объектриз бегьем ягъунар кьунва.
Ислендиз Дональд Трампа вичи Ирандин энергетикадин объектрал гьужум авунин гьерекатар 5 йикъан муддатда акъвазарунин тапшуругъ ганва лагьана малумарнай. Ихьтин тапшуругъ ада гуя ислягьвал хуьн патал икьрардал атайдалай кьулухъ гайиди я лугьузвай. Трампан гафаралди, къалмакъал арадай акъудун патал веревирдер авун Ирандин патай атай теклиф я, гьа са вахтунда рахунар Ирандин вини дережадин регьбер Моджтаба Хаменеидихъ галаз кьиле физвач. Тестикьарзавайвал, рахунар гьафтеда давам жеда.
Ягъунар давамарда лугьузва
Израилдин премьер Б. Нетаньяхуди ихтилатнавайвал, адаз Дональд Трампа Ирандин патахъай икьрар кутIунун мумкин тирди лагьанва. Идакай «ТАСС» чешмеди хабар гузва.
Ада къейднавайвал, Израилди Ирандизни Ливандиз ягъунар кьун мад давамарда. ГьакIни ада са шумуд югъ идалай вилик Ирандин гуя кьве ядерщик тергна лагьана.
Макьсадрив агакьнач
Ирандиз аксивалунин жигьетдай США вилик эцигай гьич са макьсаддивни агакьнач. Ихьтин фикир США-дин армиядин отставкада авай подполковник Д. Дэвиса «Х» сетда кхьена.
«Чна гзаф иранвияр кьена, хейлин объектар хъиткьинна, амма и дяведа чун вилик эцигай гьич са макьсаддивни агакьнач», – кхьенва ада.
Адан гафаралди, Вашингтондивай Ирандин режим, яргъал мензилдиз фидай ракетаяр, дяведин къуватар ва ядерный объектар тергиз хьанач. Америкадин сиясатдин чIуру нетижайрикай рахадайла, ада къейдна хьи, эхиримжи гьерекатри США-диз хийир ганач, акси яз, мидяйрин кьадар артухарна.
Ирандив эгечIунин стратегиядин саягъ авач лугьуз, США-дин оборонадин виликан министр Д. Мэттиса Д.Трампан администрация критика авунай. Ада гьакIни Тегерандиз талукь яз США-динни Израилдин умуми стратегиядин макьсадрай кьил акъатзавач лагьанай.
«Лезги газет»
