Жув фадлай яратмишунрин рекье авай кас яз, за гзаф ктабар кIелна, абурукай газетриз макъалаяр, жуван фикирар кхьена. Мукьвара «Новый Кавказ» дестеди «Куьредин ярар» культурадин центрадихъ галаз санал акъуднавай Соня Ибрамхалиловадин «Гьарфарин вилаятдиз сейр» ктаб, зи фикирдалди, ажайибди я…
Мукьвара вичин 75 йисан юбилей къейд авур С. Ибрамхалилова 1951-йисуз Агъа СтIалрин хуьре дидедиз хьана. Ада хуьруьн юкьван школа, Дагъустандин госуниверситетдин филологиядин факультет акьалтIарна. Яргъал йисара Агъа СтIал-Къазмайрин юкьван школада муаллимвиле кIвалахай Соня Керимовна Дагъустан Республикадин образованидин отличник, РФ-дин умуми образованидин гьуьрметлу работник, Президентдин грантдин сагьиб я.
Соня Ибрамхалилова шаирни я. 2011-йисуз адан шииррин «Земземдин зерреяр» ва 2021-йисуз «Руьгьдин гуьзгуь» ктабар акъатна.
Адан цIийи ктаб сифтегьан классра кIелзавай ва аялрин бахчайра тербия къачузвай гъвечIи яшарин аялриз дидед чIал чир хьуниз куьмек яз акъуднава. «А-дилай Я-дал кьван сейр» кьил ганвай ктабдин сад лагьай паюна лезги алфавитдин гьар са гьарф (лап чIехидаказ) кхьенва, гьарфунин кIанихъай гьа чина авай гьарфунилай къвезвай гафунилай башламиш жезвай 4 цIарцIикай ибарат бенд ва гьа гьарфунилай вичин тIвар къвезвай инсанрин, гьайванрин, къушарин, емишрин… шикилар ганва. Мисал яз, ктабдин 13-чина кьилелай Д гьарф ала, ахпа ихьтин бенд ганва:
Данадиз векь гузва за,
Гьар пакамахъ къарагъиз,
Эгер зун геж хьайитIа,
Акъвазда ам гьарайиз.
Бендинин кIанихъай данадин шикил ганва.
Гьарфар ва Москвада яшамиш жезвай агъастIалви художник М. Бутинади (Агьмедпашаевади) чIугунвай шикилар чIехибур ва рангаринбур я. Абуру неинки школада ва бахчада авай аялрин, гьакIни гъвечIи бицIекрин фикирни чпел желбда. Шикилар къалуриз, ктабда авай бендер чIехи дидейривайни бубайривай чпин хтулризни птулриз кIелиз жеда. Кхьинин чIални кIелзавайди фад ва регьятдиз гъавурда акьадайди я.
«Халкьдин сивин яратмишунар» кьилин кьвед лагьай паюна гьар са гьарфунихъ галаз гьадалай башламиш жезвай лезги халкьдин мисалар ганва.
Хазран Кьасумов
