Терроризм — им вуч мусибат я? Эхиримжи 10 йисара инсанрин кьилел залум тIимил дуьшуьшар атанач. Хъиткьинунар, цIаяр кьунар, кьиникьар, чIур хьанвай кьисметар… Терроризм гзаф хаталу я. Гьикьван и тIегъуьндин вилик пад кьаз алахъзаватIани, гьайиф хьи, ара физ, кицIи кьурди хьиз, секин чкадай пад акъудзава.
ИкI терроризмди Бесландин агьалийриз иллаки еке гуж авуна. 2004-йисан сентябрдиз мектебдиз фейи малаикрин кьилел къурай цIай вуч я! Вуч тахсир квай а балайрик? Аялар уьмуьрдин цуьквер я. Бес цуьквериз кIур гудай инсанар жедани?! Гьикьван дидеяр, гьарайдал ацалтна шехьиз хьана. Заз чиз, дидедин некIедин тIан хъванвай инсандивай жедай крар туш ибур.
Мадни гьайиф къведай кар ам я хьи, чи йикъарани хейлин жегьилар и тIегъуьндин есирда гьатзава. Мисалар гзаф гъиз жеда. Вири обществоди, и кар кьатIана, санал кIвалахун герек я. Еке къал диде-бубайрал ала. Хизанда аялриз гузвай тербиядин бине мягькемди, кутугайди хьайитIа, пакадин югъни экуьди жеда. Эгер хизанда тербиядин месэла гъиляй вегьейтIа, нетижаяр писбур хьунин еке хаталувал ава. Гзаф хизанра аялриз тербия гунин месэла хъсан чкадал алач. КIвалахдин гъиляй бязи диде-бубайри гьатта чпин веледрин тарсарални гуьзчивал тухузвач.
Заз жуван куьруь макъала «Терроризмдиз — ваъ!» шиирдалди акьалтIариз кIанзава.
Терроризмдиз ваъ лугьузва, къарагъна,
Гъилер кьуна, ваъ лугьузва, гьарайна.
Бес хьурай тIун дуьньяд винел зулумар
Гьикьван эхда зурба чили зурзунар?!
Дидед вилел гьикьван хьурай бес накъвар,
Балайризни гьикьван акурай гужар?
Секин хьухь куьн, акьулсузар, ахмакьар.
Мурад я чи гележег ва шад йикъар.
Терроризм – ваъ, ислягьвал – эхь лугьуда!
Сад хьанвайла, халкьди къванни цIурурда,
Элдин кьилел вили цавни амукьда,
Ислягь дуьнья гафар япарихъ галукьда.
Л. Уружбегова,
Курхуьруьн 2-нумрадин мектебдин муаллим
